Заводскойы поселочы æвзонг юмористтæ ахæм стыр фестивалы фыццаг хатт нæ архайдзысты
Хъæлдзæг æмæ цыргъзондты клуб «Мексика» Анапæйы архайдзæн æппæтадæмон фестивалы. Фæсивæд хъаздзысты иу конкурсы – «Приветствие», зæгъгæ. Æдæппæтæй сывæллæтты фестивальмæ æппæт дунейæ æрæмбырд уыдзæн 4 сæдæ командæйы. Не мзæххон командæйæн разамынд дæтты Зæнджиаты Алан. Заводскойы поселочы æвзонг юмористтæ ахæм стыр фестивалы фыццаг хатт нæ архайдзысты. Фæлæ сæ балц куы нæ рауадаид, уымæй дæр уыди тæссаг. Баххуыс сын кодтой спонсортæ. Се хсæн республикæйы Хицауады сæрдары хæдивæг Икъаты Русланбег, Парламенты депутат Битарты Алик, горæты æмбырды депутат Гæдиаты Геннадий, æмæ республикон КВН-ы театры директор Плиты Сослан. Уæ зæрдыл уын æй лæууын кæнæм, фарон сывæллæтты командæ Цæгат Ирыстоны кад хъахъхъæдта канал СТС-ы телевизион лигæйы. Фæсивæдæн сæ къухы бафтыди æрдæгфиналмæ бацæуын.
