Цыколайы 2-æм скъолайы аразынц спортивон æмæ фæлладуадзæн фæз
Хъæуккаг территориты комплексон рæзты паддазхадон программæмæ гæсгæ Æрæфы районы аразынц социалон объекттæ. Цыколайы 2-æм скъолайы аразынц спортивон æмæ фæлладуадзæн фæз. Ахæм бынат фæзындзæн 3-æм скъолайы территорийы дæр. Уымæй дарддæр ма паддзахадон программæйы фæрцы бындурон цалцæг цæуы Цыколайы социалон лæггæдты центры. Уæвгæ, программæ Цæгат Ирыстоны æххæстгонд цæуы 2020-æм азæй фæстæмæ. Бæлвырддæр хабæрттæ радзурдзæн Чехойты Фатимæ.
Ныридæгæн дæр бæрæг сты фидæны сывæллæтты хъазæн фæзы арæнтæ. Цыколайы 2-æм скъолайы кæрты паддзахадон программæ «Хъæуккаг территориты комплексон рæзт» æххæстгæнгæйæ райдыдта спорт æмæ фæлладуадзыны бынаты арæзтад. Проектмæ гæсгæ ам фæзындзæн ног фæрæзтæ хъазынæн æмæ спортæй архайынæн, бадæн бынæттæ æмæ рухсгæнæнтæ. Специалисттæ сæвæрдтой брусчаткæ. Уыдзæн дзы фæзтæ футболæй æмæ баскетболæй хъазынæн.
Паддзахадон программæмæ гæсгæ ног спортивон фæз сараздзысты Цыколайы 3-æм скъолайы дæр. Спортивон комплексы фарсмæ фæзындзæн бынат теннисæй хъазынæн. Куыстытæ фæуынвæнд кæнынц ацы ахуыры аз. Ног хъазæн фæзтæм æнхъæлмæ кæсынц бынæттон цæрджытæ.
Паддзахадон программæ æххæстгæнгæйæ бындурон цалцæггонд цæуы Цыколайы социалон лæггæдты центр. Æрбынат кодта дыууæ бæстыхайы. Уыдонæй иу у нырыккон, иннæ та арæзт æрцыд ивгъуыд æнусы 60-æм азты. Уæдæй нырмæ цалцæггонд иу хатт дæр нæ уыд. Специалисттæ фесты демонтаж, сног кодтой инженерон коммуникацитæ, баивтой бæстыхайы сæр. Баззадис ма мидæггаг куыстытæ скæнын. Подрядон куыстуаты директор Гетагъазты Русланы ныхæстæм гæсгæ, объект эксплуатацимæ раттын фæнд кæнынц сентябры кæрон.
Паддзахадон программæ «Хъæуккаг территориты комплексон рæзт» Цæгат Ирыстоны æххæстгонд цæуы 2020 азæй фæстæмæ. Йæ фæлгæты рацарæзтой, бындурон цалцæг скодтой æмæ сарæзтой 40 объектæй фылдæр. Уымæй уæлдай ма республикæйы алы районты конд æрцыд хъæуккаг территоритæ саив кæныны 150 мадзалы. Уый у ахадгæ фæрæз нырыккон царды уавæртæ аразынæн.
Хъæууон хæдзарады министрады паддзахадон программæ «Хъæуккаг территориты комплексон рæзт» -æн ис ахсджиаг нысаниуæг национ проект «Технологическое обеспечение продовольственной безопасности» æххæст кæнынæн. Ацы хъæппæристæ хъæуынц хъæуккаг адæмы царды уавæртæ фæхуыздæр кæнынæн æмæ бæстæйы хойраджы хъомыс фидар кæнынæн.
