Видеоконференцийы хуызы йæ амыдта республикæйы Сæргълæууæг Битарты Вячеслав
Хъæуты цæрджытæн фыццаг медицинон-санитарон æххуыс кæныныл ныхас цыд Оперативон штабы радон æмбырды. Видеоконференцийы хуызы йæ амыдта республикæйы Сæргълæууæг Битарты Вячеслав.
Ивгъуыд æмæ ацы аз Цæгат Ирыстоны цы фельдшерон-акушерон пункттæ æмæ амбулаторитæ сарæзтой, уыдон хъуамæ æххæстæй кусой республикæйы цæрджыты удæнцойдзинадæн. Битарты Вячеслав куыд загъта, афтæмæй ацы фарстайы уæлдай бæрнондзинад хауы районты клиникон рынчындæтты сæйраг дохтыртæм, стæй республикæйы æнæниздзинадхъахъхъæнынады Министрадмæ.
Сæйраг дохтыртæ хъуамæ сæ цæст дарой медицинон объектты арæзтадмæ æмæ цалцæггæнæн куыстытæм. Уымæй дарддæр хъуамæ афоныл цæттæ кæной бардæттæг гæххæттытæ. Ног объекттæ та хъуамæ адæмæн хæссой пайда. Уый тыххæй арæзт цæуынц, загъта Цæгат Ирыстоны разамонæг æмбырды архайджытæн.
2020-æм азы нæ республикæйы, национ проекттæ æмæ паддзахадон программæтæ æххæст кæнгæйæ, сараздзысты æмæ сцалцæг кæндзысты 36 фельдшерон-акушерон пункты æмæ амбулаторийы. Иннæ ахсджиаг фарста у – кадртæй ифтонгдзинад. Уымæ гæсгæ Битарты Вячеслав бабар кодта, цæмæй æрыгон дохтыртæ бацархайой паддзахадон программæты: «Хъæуккаг территориты рæзт», «Хъæуты кусæг фельдшер», стæй «Хъæуты кусæг дохтыр»-ы. Уый фадат ратдзæн æрыгон специалистты куысты бынæттæй сифтонг кæнынæн, æмтгæй райсгæйæ та – хъæуккæты царды уавæртæ фæхуыздæр кæнынæн.
