Медицинон фæлтæрддзинад æм фæзынд пандемияйы рæстæг госпиталы сырх зонæйы кусгæйæ
Нæ дарддæры æрмæджы та радзурдзыстæм, сæрмагонд æфсæддон операцийы нæ республикæйæ чи архайы, уыцы хæстонтæй иуы истори. Хъалæгаты Гаянæ у фельдшер бархион батальон «Алани»-йы хыгъды. Медицинон фæлтæрддзинад æм фæзынд пандемияйы рæстæг госпиталы сырх зонæйы кусгæйæ. Абон Гаянæ, йæхиуыл нæ ауæрдгæйæ, æххуыс кæны нæ хæстонтæн. Ныфсхаст сылгоймаджы тыххæй радзурдзæн Хъайтмазты Дзерассæ.
Йæ гуырæн бон дæр Гаянæ арфæтæ исы, цæф хæстонтæм зилгæйæ. Æрлæууы æрмæст цалдæр минутмæ, æмæ та ногæй йæ пост бацахсы. Алкæддæр цæттæ вæййы фыццаг медицинон æххуыс бакæнынмæ, хъарм ныхæстæ зæгъынмæ. Уый йæ куысты хæс нæу, фæлæ йæ зæрдæйы фæндон.
Хъалæгаты Гаянæ йæ ахуырадмæ гæсгæ у юрист. Пандемияйы рæстæг куыста сырх зонæйы. Куыд зæгъы, афтæмæй алцæуыл дæр уым сахуыр. Сæрмагонд æфсæддон операци куы райдыдта, уæд уайтагъд бамбæрста, цы кусдзæн, уый. Бинонтæ йæ уынаффæимæ сразы сты. Афтæмæй та бахауд, тæссаг кæм у, æмæ фидар æмæ зæрдæхæлар адæмы æххуыс кæм хъæуы, уырдæм.
Чысыл алагираг чызгæн йæ царды стырдæр бæллиц уыд йæ фыды аккаг суæвын. Батальон «Алани»-йы уыд æмæ у иунæг сылгоймаг. Ис бархион медицинон отряды сæргъы. Бахæццæ вæййы, тагъд æххуысæн йæ бон бацæуын кæдæм нæу, уырдæм. Афтæ кæсы, цыма алцыдæр федта. Фæлæ ис, тасы йæ цы æфтауы, уый.
Фыццаг цæстæнгасæй нæй бамбарæн, ацы чысыл, гуырвидауц сылгоймагæн ахæм хъæддых удыконд кæй ис, уый. Ацы кадртыл судзы батальон «Алани»-йы медицинон пункт. Диссагæн, хъыгдард ничи баййæфта. Гаянæйы уырны, ирон хæстонтæн уæларвон тыхтæ кæй æххуыс кæнынц. Се нæниздзинадæн кувынц бынæттон цæрджытæ дæр.
Хъалæгаты Гаянæ – Бархион батальон «Алани»-йы медицинон хо:
«Наших ребят оч сильно любят. Потому что воспитание по отношению к детям, женщина, старикам – совсем другое. Боец зайдет в магазин, себе не купит, но увидев голодные глаза ребенка – ему купит» (Гаяна 14)
Аст у йæ уарзон нымæц æмæ æгæронады символ. Уымæ гæсгæ йæхицæн фæсном дæр райста Астан.
Социалон хызты ацы кадртæм æппæт республикæ дæр каст цæстысыгтимæ. Сæрмагонд æфсæддон операцийы зонæйы сæмбæлдысты хо æмæ æфсымæр. Кæрæдзийы афæдзæй фылдæр нæ федтой. Гаянæ батальон «Алани»-йы хыгъды фельдшерæй ацыд фарон апрелы, сентябры та мобилизацигонд æрцыд Таймураз. Цалдæр мæйы сылгоймаг агуырдта йæ кæстæр æфсымæры, мæт ыл кодта. «Алани»-йы хæстонтæ сын баххуыс кодтой сæмбæлынмæ.
Гаянæ ахæм хæрзконд у, æмæ йын æппæтæй къаддæр формæ дæр стыр вæййы, бахъæуы йæ æрхуыйын. Нæй йын рæстæг хи аив кæнынæн дæр, фæлæ уыцы хъуыддаг æххæст кæны йæ æрдзон рæсугъддзинад.
Аив йæ бакастæй, фæлмæн йæ мидбылхудтæй. Æфсармджын æмæ хиуылхæцт сылгоймаг. Уый нæ хынцгæйæ, службæгæнæг Астан йæхимæ се ппæты ргом дæр здахы. Мæнæ ныфсхаст Гаянæйы къамы æрбахъæбыс кодта йæ фырт. Уыимæ йæ зæрдæ æппынæдзухдæр фæдзуры йæ хъæбултимæ. Фæлæ уыцы æнкъарæнтæ тохы быдыры хъæуы æмбæхсын, – зæгъы медицинон хо.
Хуымæтæг æфсæддон бонты арæх куыд вæййы, афтæ трагикон цаутæй сабыр рæстæджы хсæн иу къахдзæф. Хъалæгаты Гаянæйы батальонтæ «Алани» æмæ «Шторм.Осетия»-йы хæстонтимæ Хицауады хæдзары схорзæхджын кодтой сыгъдæг къниаз Александр Невскийы райгуырды боны 800 азимæ баст майданæй. Уый у йæ фыццаг хæрзиуæг.
Алцыдæр къухы бафтдзæн, уырны Гаянæйы. Уæлахизы бон æнæмæнг æрлæудзæн. Гаянæ раласдзæн йæ каскæ, бронежилет æмæ сæххæст кæндзæн йæ бæллиц – скæндзæн аив къаба, рæсугъд къахы дарæс æмæ батальон «Алани»-йы хæстонтимæ атезгъо кæндзæн уæгъдгонд горæтты райдзаст уынгты.
