Уæздан ирон лæг, уæззау зондыл хæст поэт æмæ фыссæг. Йæ алы ныхас дæр уыд стыр хъуыдыйы фæстиуæг. Цæрукъаты Алысандры сфæлдыстад у ирон литературæйы ирддæр фæзындтытæй иу.
Цæрукъаты Алыксандры фырты фырт Азæмæт кæсы йæ фыды фыды æмдзæвгæ. Лæппу йæ ныййарджытимæ цæры Мæскуыйы, фæлæ ацы хъуыддаджы тыххæй ссыд Цæгат Ирыстонмæ. Зындгонд поэт æмæ фыссæг Цæрукъаты Алыксандр райгуырд æмæ схъомыл Хъарман-Сындзыхъæуы. Уым каст фæцис скъола, уый фæстæ та Цæгат Ирыстоны педагогон иснтитут. Куыста ахуыргæнæгæй. Ахуыр ма кодта Максим Горькийы номыл литературон институты дæр Мæскуыйы.
Уæздан ирон лæг, уæззау зондыл хæст поэт æмæ фыссæг. Йæ алы ныхас дæр уыд стыр хъуыдыйы фæстиуæг. Цæрукъаты Алысандры сфæлдыстад у ирон литературæйы ирддæр фæзындтытæй иу. Поэт стыр æвæрæн бахасты тæлмацгæнæн куыстмæ дæр. Йе `мзæххонтæ дзы сты сæрыстыр. Йæ хиуæттæ æмæ йæ мыггаджы минæвæрттæн дæр у тынг æхсызгон, сæ кадджын фырты ном рох кæй нæу, уый.
Мысæн изæр рауад зæрдæмæ хъаргæ. Скъоладзаутæ кастысты поэты æмдзæвгæтæ. Бацæттæ кодтой концерт дæр. Æхсæнады минæвæрттæ та дзырдтой Цæрукъаты Алыксандры тыххæй сæ мысинæгтæ, ирон театры артисттæ та кастысты скъуыддзæгтæ поэты уацмыстæй.
Мысæн изæр арæзт æрцыд Хъарман-Сындзыхъæуы культурæйы хæдзары. Фойейы та уыди Цæрукъаты Алыксандры чингуыты равдыст.
«Æмдзæвгæтæ», «Сæууон зарджытæ», «Царды авдæн», Агния Барто, Корней Чуковский æмæ Джанни Родарийы уацмысты тæлмацтæ сывæллæттæн ирон æвзагыл. Цæрукъаты Алыскандр ирон литературæйы цы хæзнатæ ныууагъта, уыдонæн сæ ахадындзинад егъау у, æмæ сæ хъуамæ зоной рæзгæ фæлтæрты минæвæрттæ.
Гугкаты Иринæ