Майы фронтовиккы ном хаст æрцыдис Гинессы рекордты чиныгмæ
Хъарман-Сындзыхъæуы йæ цардæй ахицæн Уæрæсейы æппæты хистæр хæсты ветеран Мæрзойты Тимофей. Майы фронтовиккы ном хаст æрцыдис Гинессы рекордты чиныгмæ. Мæрзойты Тимофей райгуырд Алагиры районы, Мызуры. Хæст куыддæр райдыдта, афтæ йæм фæсидтысты Сырх Æфсады рæнхъытæм. Мæрзойты Тимофей архайдта Кавказы хæсты, тох кодта Украинæ, Молдави, Румыни, Болгари, Югославийы сæрибарыл. Уæлахизыл сæмбæлд Австрийы. Хорзæхджынгонд æрцыдис Фыдыбæстæйы Стыр хæсты дыккæгæм къæпхæны орденæй, Кавказ хъахъхъæныны тыххæй, Германыл фæуæлахизы тыххæй майдантæй æмæ æндæр хæрзиуджытæй. Ветераны бинонтæ æмæ хиуæттæн тæфæрфæс ракодта Цæгат Ирыстоны сæргълæууæг Сергей Меняйло. «Мæрзойты Тимофей уыдис фыдыбæстæйы аккаг хъæбул, йæ райгуырæн бæстæйы патриот. Зын у, нæ хистæртæ не хсæнæй куы фæхъæуынц, уæд. Йæ ном нæ рох никуы уыдзæнис. Рухсаг уæд Мæрзойты Георгийы фырт Тимофей» – уыдис загъд фыстæджы. Мæрзойты Тимофейыл цыдис 106 азы.
