Экспертты хъуыдымæ гæсгæ, аххосæгтæй иу у – адæм сæхæдæг газы кусæнгæрзтæ кæй сæвæрынц, уый
Хъармгæнæн сезоны райдианæй нæ республикæйы сыгъдхъæстæ фесты 20 адæймаджы. 9-æй фæмардысты. Экспертты хъуыдымæ гæсгæ, аххосæгтæй иу у – адæм сæхæдæг газы кусæнгæрзтæ кæй сæвæрынц, уый. Уыимæ арæх нæ фæхъуыды кæнынц, цавæр фæстиуджытæм расайы ацы хъуыддаг, уый. Стæй ма ницæмæ æрдарынц техникон лæггæдты тыххæй бадзырд. Цавæр домæнтæ хъæуы æххæст кæнын, уый тыххæй радзурдзæн Гуытъиаты Алинæ.
Ӕрдзон артаг ӕрмӕст удӕнцойӕн нӕу, фӕлӕ ма адӕймагыл ӕвӕры стыр бӕрнондзинад. Хи хӕдзӕртты цӕрджытӕ хъуамӕ ӕнӕмӕнгӕй бафыссой газы ифтонгарзы лӕггады бадзырдтӕ. Уыцы домӕн хӕдзары хицау куы нӕ сӕххӕст кӕна, уӕд газы службӕйӕн ис бар, ӕрдзон артаг ӕруыромынӕн. Ӕдасдзинады фарстатӕм куыдфӕндыйы цӕстӕй кӕсӕн нӕй.
Ай та уын Дзӕуджыхъӕуы газуарӕн компанийы специалисты куыст. Михаил ӕрвылбон бӕрӕг кӕны хъармгӕнӕн агты ӕмӕ калонкӕты куыст. Аиппдзинӕдтӕ куы ссары, уӕд сӕ уайтагъд аиуварс кӕны. Ацы хӕдзары пец кусы куыд ӕмбӕлы афтӕ, фӕлӕ уӕддӕр специалист хӕдзары хицауӕн бауайдзӕф кодта.
Цӕстдарды мадзӕлттӕ ӕххӕстгонд кӕй нӕ цӕуынц, уый аххосӕй ӕрцӕрынц фыдбылызтӕ – зӕгъынц эксперттӕ. Хъыгагӕн, уыцы тӕссагдзинад адӕм не мбарынц. Сыгъд газ хонынц ӕдзӕм лӕгмар дӕр. Нӕй йын нӕдӕр хуыз, нӕдӕр тӕф кӕнӕ ад. Фӕлӕ фондз минутмӕ йӕ бон у стыр фыдбылызтӕ саразын. Газы ифтонгарз раст ӕвӕрд куы нӕ уа, раст дзы куы нӕ пайда кӕной кӕнӕ та йын афойнадыл профилактикӕ куы нӕ аразой, уӕд сыгъд газы концентраци фесты марг.
Ифтонгарзы диагностикӕ хъуамӕ ӕппынкъаддӕр уа афӕдз иу хатт ӕмӕ йӕ кӕной, сертификаци кӕмӕ ис ахӕм специалисттӕ. Уыдон сбӕрӕг кӕнынц кусӕнгӕрзты уавӕр ӕмӕ уӕд радтынц куыстытӕ кӕй сӕххӕст кодтой, уый тыххӕй акт. Газы службӕйы специалисттӕ куыд зӕгъынц афтӕмӕй хъуамӕ алы хӕдзарӕн дӕр уа техникон лӕггӕдты бадзырд. Уый тыххӕй хъӕуы бацӕуын газуарӕн компанимӕ. Уый у фыццаджыдӕр ӕдасдзинады домӕн, стӕй абонентӕн бар дӕтты газы специалисты ӕххуыс бацагуырын.
Иу мин ӕмӕ фондзсӕдӕ сомы бӕрц слӕудзӕн цӕрджытӕн техникон лӕггӕдты бадзырд. Уыцы хъуыддагыл фӕстауӕрц кӕнӕн нӕй. Дзӕуджыхъӕуы 126 мин абонентӕй 90 мины бафыстой техникон лӕггӕдты бадзырд. Иннӕтӕ та чи зоны ӕмӕ нырма ӕххӕстӕй нӕ бамбӕрстой уавӕры тӕссагдзинад.
