Ахæм ахсджиаг хæстæ ныр 30 азы æххæст кæны Мæздæджы районы станицæ Павлодольскæйы ансамбль «Казачья воля»
Хъазахъхъæгты культурæ сног кæнын, бахъахъхъæнын æмæ йæ райрæзтыл кусын. Ахæм ахсджиаг хæстæ ныр 30 азы æххæст кæны Мæздæджы районы станицæ Павлодольскæйы ансамбль «Казачья воля». Юбилейон концерты аивадуарзджыты размæ рахастой сæ хуыздæр номыртæ. Æвзонг Мария Львова равдыста фланкировкæйæ дæсныдзинад. Уый у, шашкæимæ архайды арæхстдзинад æмæ артистизм кæм баиу вæййынц, ахæм кафт. Мария æмæ иннæ хъазахъхъæгтæ зæрдиагæй кæнынц сæ фыдæлты зарджытæ. Архивон кадрты фæрцы зæрдыл æрлæууын кодтой ансамблы сфæлдыстадон архайд куыд райдыдта, артисттæ алыхуызон конкурсты куыд архайдтой æмæ хистрæтæн кад куыд кодтой, уый. Коллективæн юбилейы фæдыл раарфæ кодтой хицауадон оргæнты, хъазахъхъаг культурæйы республикон центры минæвæрттæ, Теркаг хъазахъхъæгты разамонджытæ, æмкусджытæ районы алы хъæутæй. Концерты фæстæ юбиляртæн саккаг кодтой хæрзиуджытæ – кады гæххæттытæ æмæ майдантæ.
