Ныртæккæ хъазахъхъаг æхсæнадты нымæц фæфылдæр авды онг
Хъазахъхъаг æхсæнады уæнгтæн радон цинтæ дæттыны кадджын мадзал арæзт æрцыд Мæздæджы. Архайдтой дзы Мæздæджы æмæ районты станицæты минæвæрттæ. Ныртæккæ хъазахъхъаг æхсæнадты нымæц фæфылдæр авды онг. Ног æхсæнад арæзт æрцыд станицæ Черноярскæйы. Æрмæст фарон хъазахъхъаджы æвдисæндартæ райстой Мæздæджы районы сæдæгай цæрджытæ. Бирæ станицæты кусынц сæрмагонд скъолатæ, архайынц хъазахъхъаг кълæстæ. Уыдоны сывæллæттæ ахуыр кæнынц чырыстон культурæ, æхсæнады истори, æфсæддон дисциплинæтæ. Арæзт æрцыдысты бæхыл бадынæй ахуыртæ. Хъазахъхъаг æхсæнады минæвæрттæ барадхъахъхъæнæн оргæнты кусджытимæ иумæ æдзухдæр фæархайынц Мæздæджы æмæ районы станицæты æхсæнадон фæткæвæрд хъахъхъæныны хъуыддаджы. Æппæтæй активондæр минæвæртты схорзæхджын кодтой риуылдаргæ нысантæй æмæ кады гæххæттытæй.
