Хетæгкаты Къостайы номыл ирон литературæйы музей сæхгæндзысты реставрацимæ

07 мая 2014, 11:10

Ивгъуыд æнусы 20-æм азты архитектор Ребикины проектмæ гæсгæ арæзт бæстыхай ис кæлæддзаг уавæры. Республикæйы вице-спикер Челæхсаты Рустем æмæ культурæйы министр Хæбæлаты Фатимæ бабæрæг кодтой объект æмæ сбæрæг кодтой, цы куыстытæ дзы бакæнын хъæуы, уыдон. Куыд бафиппайдтой, афтæмæй дзы цалцæггæнæн куыстытæ хъæуы афтæ скæнын, цæмæй бæстыхайæн йæ хуыз ма аива. Уымæн та хъæуы арæзтадон экспертизæ скæнын æмæ йын проект саразын. Хъуамæ дзы уой хорз гидроизоляцион æмæ вентиляцион системæтæ. Музейы ис бирæ цымыдисаг æмæ, æмбал кæмæн нæй, ахæм экспонаттæ, къухфыстытæ, Зеленчуккы дуры къопи, Байаты Гаппо сын кæй балæвар кодта, уыцы дзаумæттæ. Хæбæлаты Фатимæйы ныхæстæм гæсгæ цалцæджы фæстæ музей хъуамæ уа нырыккон, цымыдисаг, уæлдайдæр фæсивæдæн. Уыимæ йæ фæнд кæнынц ног экспонаттæй фæхъæздыггæр кæнын.