8-æм январы онг кусдзæн алы бон дæр 11 сахатæй изæры 8 сахатмæ
Хетæгкаты Къостайы номыл культурæйы æмæ фæлладуадзæн Центрон парчы кусын райдыдта Митын дадайы Хæдзар æмæ æрмадз. 8-æм январы онг кусдзæн алы бон дæр 11 сахатæй изæры 8 сахатмæ. 9-æм январæй – 15-æм январы онг та 17 сахатæй – 21 сахатмæ. Афтæмæй ма аргъæутты алæмæты дуне бабæрæг кæнынæн рæстæг ис. Бирæтæ ныридæгæн дæр уыдысты уазæгуаты уарзондæр Дадамæ.
Ног боны æхсæвы сусæгæй бацæуы алы хæдзармæ дæр, ныртæккæ та йæхæдæг у фысым, æмæ æнхъæлмæ кæсы уазджытæм. Нæ бæстæйы сæйраг Дада дарддæр се ппæтæн дæр лæвар кæны бæрæгбоны æнкъарæнтæ, сабиты ахоны аргъæутты алæмæты дунемæ. Митын Дадаимæ базонгæ уæвын бирæты фæнды. Æмæ куыд нæ? Лæппутæ æмæ чызджытæ канд адджинæгтæ нæ райсынц лæварæн, фæлæ ма сæхæдæг дæр уарзон Дадайæн аив бакæсынц æмдзæвгæтæ.
Митын Дадаимæ æмæ Митын Чызгимæ симгæ кафт акæнын, аргъæутты персонажты зын уыци-уыцитæ базонын, æмæ ма кæрæдзиимæ пайдаимæ рæстæг арвитын. Чысыл хæдзары къæсæрæй бахизгæйæ, алкæмæн дæр фадат ис аргъæутты дунейы фестынæн. Суанг ма йыл хистæртæ дæр бадис кæнынц.
Афтæмæй Митын Дадайы хæдзары фарсмæ æрбынат кодта йæ алæмæты æрмадз дæр. Цалынмæ иутæ заз бæласы алыварс зилынц, уæдмæ иннæтæ та архайынц адджинæгтæ кæныныл. Кæд æмæ уарзондæр бæрæгбон кæронмæ фæхæццæ кæны, уæддæр диссæгтæ та царды цæуынц дарддæр. Уымæн хорз æвдисæн – ацы алæмæты хæдзар. Митын Дада æмæ дзы Митын Чызг зæрдиагæй æнхъæлмæ кæсынц уазджытæм. Республикæйы цæрджытæн æй бабæрæг кæныны фадат уыдзæн 15-æм январы онг.
