Ам æппæтуæрæсеон фестиваль «Вахтангов. Путь домой»-йы фæлгæты арæзт æрцыд Пушкины бон
Хетæгкаты Къостайы номыл парчы æрæмбырд сты республикæйы театруарзджытæ æмæ уазджытæ. Ам æппæтуæрæсеон фестиваль «Вахтангов. Путь домой»-йы фæлгæты арæзт æрцыд Пушкины бон. Парчы 5 раны æвдыст цыдысты зындгонд поэты уацмыстæм гæсгæ спектакльтæ. Хуынд сæм уыдысты æрмæст сывæллæттæ нæ. Мадзал саразджыты фæндыд, цæмæй спектакльтæм кæсынмæ адæм цæуой æнæхъæн бинонтæй. Уыдонæн се сфæлдыстадон куыстытæ равдыстой театралон коллективтæ Мæскуы, Санкт-Петербург æмæ Воронежæй. Санкт-Петербурджы труппæ «Странствующие куклы господина ПэЖо» у бирæ æппæтуæрæсеон æмæ фæсарæйнаг фестивальты лауреат, преми «Золотой Арлекин»-ы лауреат. Уый бацæттæ кодта перформ-инсталяци «Саша спит». Уынгты театрæн уый хуымæтæг формат нæу. Сфæлдыстадон къорд спайда кодта инсталляцитæй. «Черная речка. Кукольная дуэль» равдыста Мæскуыйаг театр. Сценæйы бæсты ширмæ, йæ фæстæ – куклатæ амонæг. Адæмон спектаклы ацы хуызмæ кæсын æхсызгон уыди кæстæртæн. Театруарзджытæ ма федтой «Моцарт и Сальери», «Лукоморье», «Записки Черномора» æмæ æндæр спектакльтæ дæр.
