Бæрæгбоны мадзæлттæ канд нæ республикæйы арæзт не рцыдысты, фæлæ ма æндæр рæтты дæр
Хетæгкаты Къостайы райгуырды 165 азы бон рауад хъæздыг æмæ цымыдисаг. Бæрæгбоны мадзæлттæ канд нæ республикæйы арæзт не рцыдысты, фæлæ ма æндæр рæтты дæр. Мæскуыйы кадджын уавæры фесты Цæгат Ирыстоны культурæйы бонтæ. Бæрæгбоны концерт уыд Стыр театры. Æппæт æрбацæуджытæн арфæйы ныхæсты ракодта нæ республикæйы Сæргълæууæг Сергей Меняйло. Куыд загъта, афтæмæй æнæхъæн къуыри Уæрæсейы сæйраг горæты цæрджытæн фадат уыд ирон культурæимæ, историимæ æмæ традицитимæ зонгæ кæнынæн. Фидарæй мæ уырны, алчидæр æй йæ зæрдæйы арф кæй бавæрдта, уый. Бæрæгбоны кадджын уазæг уыд Уæрæсейы Федерацийы Советы сæрдар Валентина Матвиенко. Концерт та байгом кодтой маэстро Гергиты Валерий æмæ Стыр театры симфонион оркестр. Программæмæ хаст æрцыд 30 концертон номыры. Алкæцыйы дæр равдыстой Ирыстоны æмæ йæ адæмы историйы ахсджиагдæр цаутæ. Бæрæгбоны изæр сæ курдиатæй саив кодтой Цæгат Ирыстоны зындгонд коллективтæ æмæ артисттæ: Паддзахадон академион ансамбль «Алан», камерон хор «Алани», Мариинаг театры цæгатирыстойнаг филиалы балетон труппæ, зарæггæнджытæ: Дулаты Дзамболат, Цыбырты Шота, Джиоты Вероникæ, Цæрикъаты Феликс æмæ иннæтæ.
Ацы изæр Ирыстонæй рацæуджытæн лæвæрд æрцыдысты паддзахадон хæрзиуджытæ. Афтæ Гергиты Валерий сси «Ирыстоны фæллойы Хъæбатыр». Мæскуыйы облæсты паддзахадон цæстдарды сæйраг управленийы разамонæджы фыццаг хæдивæг Æлборты Тамерланы та схорзæхджын кодтой «Ирыстоны Намысы» майданæй. Хæрзиуджытæ ма райстой æнæниздзинадхъахъхъæнынады системæйы кусджытæ æмæ сфæлдыстадон коллективты солисттæ.
