Цæгат Ирыстоны алы театырты актертæ баиу сты иумæйаг куысты, архайынц актерты иронай сдзурын кæныныл
Хетæгкаты Къостайы зындгонд поэмæ «Фатимæ»-мæ гæсгæ ист киноныв тагъд фенæн уыдзæн ирон æвзагыл. Цæгат Ирыстоны алы театырты актертæ баиу сты иумæйаг куысты, архайынц актерты иронай сдзурын кæныныл. Раздæр ацы киноныв уыд ирон æвзагыл, фæлæ уыцы лентæ фесæфт. Уый хыгъд хæстæгдæр рæстæг зындгонд киноныв «Фатимæ»-мæ бакæсæн уыдзæн ирон æвзагыл, Кæй хъæлæстæй дзурдзысты Фатимæ, Дзамболат, Ибрагим æмæ æндæр актертæ, уый тыххæй базондзыстут Касаты Наирæйæ
Фатимæйы зæрдæйыл тох ныр хъуысдзæн ирон æвзагыл. Ацы сценæ кинойы у æппæтæй зындæр. Ибрагимы фæлгонц скæнын Уаниты Валерийæн æнцон нæ уыди.
Киноисæн фæзы бæсты хъæлæстæ фыссæн студи. Кусæнгæрзтæ гыццыл, актерты дæсныйад та æгæрон. Дубляж Ацы куысты ахсджиаг у алы фæзилæн дæр, интонаци, мелодикæ, хронометраж.
Алы сурæты хъæлæстæ дæр фыстой хицæнæй. Æххуыс та сын кодта режиссер. Æвæрдта хъайтарты ахастдзинæдтæ. Ацы куыстмæ рахдæхтой алы театрты артисттæ.
Семен Долидзейы кинолентæ истой уырыссаг æвзагыл, уый фæстæ та йæ ратæлмац кодтой ирон æвзагмæ. Фæлæ историон дубляж сæфт æрцыди. Нырыккон хуызæн сног кодтой хъайтарты хъæлæстæ, музыкæ, стæй нывтæ.
«Фатимæ»-йы ног хуызæн аивадуарзджытæ аргъ скæндзысты октябры астæу. Кинонывы рацарæзт баст у Хетæгкаты Къостайы райгуырдыл 160 азы кæй æххæст кæны, уыимæ.
