Цæрынæн æппын къаддæры бæрц, паддзахадон программæйы ивддзинæдтæ адæмæн куысты дæттыны фарстайы æмæ туристон фæндæгты цур лæггæдты фæзуаттæ аразын
Цæрынæн æппын къаддæры бæрц, паддзахадон программæйы ивддзинæдтæ адæмæн куысты дæттыны фарстайы æмæ туристон фæндæгты цур лæггæдты фæзуаттæ аразын. Ацы æмæ æндæр фарстатыл ныхас цыд республикæйы хицауады æмбырды.
Фæллойы æмæ социалон рæзты министр Хуыбаты Барис фехъусын кодта цæрынæн æппæты къаддæр цас хъæуы, уый бæрц. Аразгæ хойраджы чыргъæдæй, 2018-æм азимæ абаргæйæ фарон сырæзт 2%. Æмæ цæрыны бæрц сси 9 мин 231 сомы. Фæрæзтæ хицæн кæнынц адæмы царды уавæртæм гæсгæ.
Ивддзинæдтæ хаст æрцыд, национ проект «Демографи» -йы фæлгæты цы республикон программæ ис, уымæ дæр. Ныхас цæуы адæмæн куысты бынæттæ ссарынæн æххуыс кæныныл. Фарон ма нæ республикæйы кусын райдыдта программæ «Хистæр фæлтæр».
Бæрæггæнæнтæ хорз сты, йæ фæлгæты чи архайдзæн, уыдоны нымæц ацы аз фæфылдæр уыдзæн. Ныр уæлæмхасæн дæсныйад райсыны бар канд пенсимæ хæстæг чи лæууы, уыдонæн нæй, фæлæ ма 50 азæй уæлæмæ. Ацы аз фæфылдæр ис хæрдзты бæрц, уыд 34 мины, ныр та 53.
Хицауадон æмбырды ма æрдзырдтой проект «Хъæуы кусæг ахуыргæнæджы» субсидитæ хардз кæныны фæткыл. Ныхас цæуы паддзахадон программæ «Ахуырады райрæзт»-ы фæлгæты хъæуты кусынмæ чи ацыд, уыдонæн уыцы иу фиддонтыл.
Туризмы комитеты сæрдар Хъодзаты Зауырбег фæбæрæг кодта чысыл æмæ астæуккаг бизнесы минæвæрттæн фæндаггон сервис саразынæн субсидитæ фидыны домæнтæ.
Фæрæзтæ схардз кæнæн ис куыд фæзуаты арæзтад æмæ фæлгонцыл, афтæ хæрзты иу хай сæхгæнынæн. Йæ бæрц у 750 мин сомы. Сты республикон бюджетæй.
Райдайæнты рахæццысты 10 амалхъом адæймаджы фарс. 2020-æм азы царды хъуамæ рауадзой 6 проекты. Объекттæ æвæрд цæудзысты туристтæ арæх кæм цæуынц, уыцы фæндагыл.
Хицауады сæрдар Тускъаты Таймураз фæбæрæг кодта, туризмы райрæзты фарста кæй у ахсджиагдæртæй иу.
Премьер фæсидт хицауады уæнгтæм, стæй районты разамонджытæм, цæмæй цы проектты кой кодтой, уыдонмæ фылдæр æргом аздахой. Тускъаты Таймуразы ныхæстæм гæсгæ паддзахадæй цы æххуыс цæуы, уыдон хъуамæ хуыздæрыздæм фæзыной нæ иумæйаг цардыл.
