филиал вгтрк государственная телерадиовещательная компания “Алания”

Абон уыд Хицауады радон æмбырд. Амыдта йæ Такъоты Сергей. Хицауады уæнгтæ æрдзырдтой паддзахадон исбоны приватизацийы пъланыл фидæны азæн. Хаст æм æрцыдысты 10 паддзахадон унитарон куыстуаты æмæ 4 акционерон æхсæнады. Фидаргонд æрцыд курдиатджын ахуырдзауты æвзарыны æмæ сын æхцайы премитæ фидыны уагæвæрд. Ныхас цæуы скъоладзауты æппæтуæрæсеон олимпиадæты архайджытыл. Каст цыд, 2013 азы бынæттон хиуынаффæйады оргæнтæ куыд бацархайдтой, уымæ. Сæ куыстæн сын аргъ кæнынц 40 æвдисæнмæ гæсгæ. Афтæмæй ивгъуыд азы æппæтæй æнтыстджындæрыл нымад æрцыд Алагиры районы администрацийы архайд, дыккаг бынаты ис Дзæуджыхъæу, æртыккаг бынаты та Мæздæджы район. Такъоты Сергей бафæдзæхста, цæмæй бынæттон хиуынаффæйады куыст иртасгæйæ, фылдæр æргом здæхт уа бакусинаг фарстатæм, адæмы цæрыны фадæттæ хуыздæр кæнынмæ. Хицауад рахаста уынаффæ, цæмæй цæрæнуæтты-коммуналон хæдзарады фиддонтæн субсидитæ дæттыны куыст ахæццæ уа 2015-æм азы кæронмæ. Ахæм субсидитæ исынц 3700 адæймаджы, сæ коммуналон фиддонтæ сæ иумæйаг æфтиæгты стыр хай кæй ахсынц, уый тыххæй. Арæзт æрцыд, аэропорты цалцæггæнæн мадзæлттæм чи кæсдзæн, ахæм кусæг къорд.