филиал вгтрк государственная телерадиовещательная компания “Алания”

Абон уыд Хицауады радон æмбырд. Йæ райдианы Хицауады сæрдар Такъоты Сергей схорзæхджын кодта зарæггæнæг Газайты Еленæйы. Мамсыраты Таймуразы уынаффæмæ гæсгæ йын лæвæрд æрцыд «Цæгат Ирыстоны – Аланийы сгуыхт артисткæ»-йы ном. Æмбырды боны фæткы уыд 20 фарстайы. Хаст æрцыд уынаффæ ахуырады кусджытæн фидыны ног системæмæ ивддзинæдтæ бахæссыны фæдыл. Уый хъуамæ сбæлвырд кæна ахуыргæнджыты мызды фарста. Ирон æвзаг зонынады бæлвырд æнтыстдзинæдтæ кæмæн и, уыцы студенттæ æмæ æрыгон ахуыргæндтæй фондзæн снысан кодтой Абайты Васойы номыл стипенди. Цæгат-Ирыстоны Паддзахадон педагогон институты студенттæй та æртæйæ, ирон литературæ иртасыныл ахадгæйæ кæй кусынц, уый тыххæй исдзысты Плиты Грисы номыл стипенди. Боны фæткы ахсджиагдæр фарстатæй иу баст уыд адæмæн сæ цæрыны фадæттæ хуыздæр кæныны паддзахадон æххуысимæ. Фидаргонд æрцыд ног федералон программæ «Цæрæнуæттæ уæрæсейаг бинонтæн», зæгъгæ. Нæ республикæйы дæр уымæ гæсгæ нысан кæнынц бæлвырд куыст. Архайдзæн ыл арæзтады, энергетикæйы æмæ цæрæнуæтты-коммуналон хæдзарады министрад.

Алидзаты Хъазыбег, РЦИ-Аланийы арæзтады, энергетикæйы æмæ цæрæнуæтты-коммуналон хæдзарады министр: «Уыцы программæ хицæн кæны раздæры программæйæ. Раздæр паддзахадон субсидитимæ цæрæнуат балхæнын сæ бон уыд ахуыргæнджытæн, дохтыртæн, культурæйы кусджытæн, 3 æмæ уымæй фылдæр сывæллæттæ кæмæн ис, ахæм бинонтæн. Ног программæйы та ахæм гражданты категоритæ фæфылдæр уыдзысты. Нæ министрад йыл кусын райдыдта. Афæдзы кæронмæ нæ гæххæттытæ уыдзысты цæттæ».