Республикæйы Сæргълæууæг Мамсыраты Таймуразмæ æрбацыд фыстæг Уæрæсейы хъахъхъæнынады министр Сергей Шойгуйæ, ис дзы амынддзинæдтæ æфсадмæ сидыны хъуыддаг фæхуыздæр кæнынæн.
Республикæйы Сæргълæууæг Мамсыраты Таймуразмæ æрбацыд фыстæг Уæрæсейы хъахъхъæнынады министр Сергей Шойгуйæ, ис дзы амынддзинæдтæ æфсадмæ сидыны хъуыддаг фæхуыздæр кæнынæн. Гæрзифтонг тыхтæм, фыццаджыдæр, хъуамæ æрвитой, уæлдæр, кæнæ астæуккаг профессионалон ахуырад кæмæ ис, ДОСААФ-ы кусæндæтты дæсныйад чи райста, хæрзæгъдау чи у, ахæм фæсивæд. Уыимæ сæ алкæмæн дæр хъуамæ уа фæдзæхсæг. Ныхас цæуы республикæйы кад æмæ намысыл, уымæ гæсгæ æфсæддон-патриотон хъомылады фарстатæм хъуамæ цæуа бæрнон хъусдард. Зæнгионты Виталий йе ‘ргом аздæхта фидæны æфсæддонты æгъдаумæ дæр. Хъуамæ арæзт æрцæуой хистæрты æмæ фыдæлты комитеттæ, куыд республикæйы, афтæ районты дæр, цæмæй сæ цæст дарой алы æфсæддонмæ дæр.
Мæхъиты Юрий, Алагиры районы администрацийы сæргълæууæджы хæдивæг: «Æфсадмæ цæуыны размæ лæппутимæ куыст цæуы нæ районы. Фæсивæдон комитет, ветеранты къорд, «Стыр ныхас» аразынц фембæлдтæ. Афганистаны чи тох кодта, уыдонимæ дæр скъолаты вæййынц фембæлдтæ. Цы фыстæг æрцыд Шойгуйæ, уымæ дæр районы æркастыстæм. Нæ кæстæртæ нæ бæстæ хъахъхъæнынмæ рæвдз куыд уой кæддæриддæр, сæ сæрмæ куыд хæссой сæ хицауады уынаффæтæ æххæст кæнын, куыд зоной, æгаддзинад кæй нæу уынаффæ сæххæст кæнын, ууыл сæ ахуыр кæнæм».