Афтæмæй сын фадат фæзынд хойрæгты хæрзаддзинад фенынæн, æмæ сын бæрæггæнæнтæ сæвæрынæн
Цæмæй сывæллæттæ уой æфсæст æмæ хъæлдзæг. Дзæуджыхъæуы хойраджы комбинаты æмæ ахуырады Управленийы специалисттæ сæрмагондæй ныййарджытæн сарæзтой дегустацион бон. Афтæмæй сын фадат фæзынд хойрæгты хæрзаддзинад фенынæн, æмæ сын бæрæггæнæнтæ сæвæрынæн. Бæлвырддæр хабæрттæ радзурдзæн Фидараты Маринæ.
Скъолайы хæрæндоны, куыд алы хатт, афтæ бирæ адæм. Фæлæ дзы хистæр кары адæм уыйбæрц никуы вæййы. Ацы хатт уазæгуаты æрбацыдысты скъоладзауты ныййарджытæ. Хæрæндонмæ сæ æрбахуыдтой, сæрмагондæй тæвд хæринагæй ацаходынæн. Котлеттæ, пюре, кæсаг æмæ адджинæгтæ.
Фæлæ æндæр хъуыдыйыл хæст чи у, ахæмтæ дæр разындысты. Сæ фæндонтæ ныййарджытæн сæ бон у анкетæты ныффыссын, æмæ дзы алы хæринагæн дæр бæрæггæнæн сæвæрын.
Ныййарджытæ зæгъынц, меню хъуамæ уа алывæрсыг. Æнæмæнг хъæугæ сты микроэлементтæй хъæздыг хойрæгтæ. Кæсагмæ та сывæллоны хъæуы сабибонтæй фæстæмæ æмхиц кæнын.
Дзæуджыхъæуы 5-æм гимназ хуымæтæджы нæ равзæрстой. Регионæн разамынддæттæг Центры бæрæггæнæнтæм гæсгæ, ацы ахуыргæнæндонæй цыди фылдæр фæрстытæ ныййарджытæй. Æмæ ахæм мадзæлттæ сты æнæмæнг хъæугæ, цæмæй уавæрмæ цæуа бæстон цæстдард æмæ хынцой æппæт хъуыдытæ.
Æппæт хъуыддæгтыл дæр бакусдзысты – зæгъынц хойраджы комбинаты. Сæйрагдæр у – сывæллæттæн пайда хæссын. Ахæм хойрæгтæ хъуамæ уой æппынæдзухдæр, фæлæ сæ ис ивæн. Зæгъæм, кæсагæй котлеттæ баивæн ис фых кæсагæй, карчы дзидзайы бæсты та каркимæ плов, халсартæй рагу.
Дегустацийы архайджытæн фадат уыд, 10 боны дæргъы цы меню уыдзæн, уымæй ацаходынæн. Бацæттæ йæ кодтой сæрмагондæй скъоладзаутæн. Ныййарджыты бон уыди хойрæгты хæрзаддзинад фенын. Ахæм дегустацитæ арæзт цæудзысты алы ахуыргæнæндæтты. Уыимæ æнæмæнг хыгъд цæудзысты анкетæты бæрæггæнæнтæ дæр.
