Фестивалы архайдтой 9 коллективы Цæгат Кавказы регионтæй, Фæскавказæй æмæ хæстæг фæсарæнтæй
Хоры коллективты æппæтадæмон фестиваль «Мæ зæрдæ ис хæхты» кæронмæ æрхæццæ. Цыд Æрæфы районы. Фестивалы архайдтой 9 коллективы Цæгат Кавказы регионтæй, Фæскавказæй æмæ хæстæг фæсарæнтæй. Фестиваль гом æрцыд бæрæгбоны цыдæй национ уæлæдарæсы. Коллективты минæвæрттæ дæр сæ къухты хастой сæ регионты тырысатæ.
Бирæхъæлæсон зæлынад æмæ хъазахъхъаг зарæг. Цæгат Ирыстоны хæхты уыдон фехъусæн ис стæм хатт. Зæдæлескы кадджын уавæры байгом дыккаг Æппæтадæмон хоры коллективты фестиваль «Мæ зæрдæ ис хæхты». Армавиры вокалон ансамбль «Сполохи» дзы архайы фыццаг хатт. Нырма æрыгон коллектив у. Арæзт æрцыд 2 азы размæ. Ныридæгæн йæ репертуары ис 50 алывæрсыг композицийы, уыдонимæ патриотон, кубаны æмæ уырыссаг адæмон зарджытæ. Коллектив иу æмæ дыууæ хатты не сси муниципалон æмæ æппæтуæрæсеон конкурсты лауреат.
Дыккаг хатт архайы фестивалы адæмон хор Хъалмыхъæй «Сарин сарул», ома «Мæйы рухс». Зарæгмæ уарзондзинад ацы коллективы баиу кодта алы кары адæмы æмæ дæсныйæдты минæвæртты. Адæмон хорыл ацы аз æххæст кæны 10 азы. Фестивальмæ бацæттæ кодтой хъайтарон зарджытæ. Хъалмыхъæгты цардæн уæвæн нæй æнæ бæхтæй. Коллективы репертуары ис зарджытæ се *нувыд æмбæлтты тыххæй дæр.
Фестивалы уыд адæмон сфæлдыстады цыкурайы фæрдгуыты равдыст. Байгом æй кодтой кадджын уавæры бæрæгбоны цыд «Хæлардзинады дидинджытæй зиллакк»-æй. 9 коллективы архайджытæ рацыдысты сæ адæмон дарæсты, сæ къухты тырысатæ хæсгæйæ, афтæмæй. Фенæн дзы уыд Цæгат Кавказы республикæты минæвæртты, Фæскавказы æмæ хæстæг фæсарæнтæй зарæггæнджыты. Фестиваль саразджыты хъуыдымæ гæсгæ, ахæм мадзæлттæ *ххуыс сты адæмон аивады хæзнатæ хъахъхъæнынæн.
Дыккаг фестиваль «Мæ зæрдæ ис хæхты» саразæг у Цæгат Ирыстоны культурæйы министрад. Проект скæнын бантыст «Уæрæсейы культурæйы Фонды» гранты æххуысæй федералон проект «Сфæлдыстадон адæм»-ы фæлгæты. Æрмæст архайджытæн нæ, фæлæ Цæгат Ирыстоны цæрджытæн æмæ республикæйы уазджытæн фестиваль сси, сæ зæрдыл бирæ азты кæй дардзысты, ахæм рæсугъд бæрæгбон.
