2008-æм азы, 7-æм августы æхсæвы Гуырдзыйы æфсæдтæ, артиллерийон хæцæнгарзæй æхсын райдыдтой Цхинвал æмæ йæм хæстæг цы районтæ ис, уыдон.
Хуссар Ирыстоны абон у хъыджы бон. 2008-æм азы, 7-æм августы æхсæвы Гуырдзыйы æфсæдтæ, артиллерийон хæцæнгарзæй æхсын райдыдтой Цхинвал æмæ йæм хæстæг цы районтæ ис, уыдон. Фæмард сты сæдæгай адæмтæ. Горæты цæрджыты бон не ссис сæхи бахъахъхъæнын. Гуырдзыйы æфсады фыццаг æхстытæ сæмбæлдысты Уæрæсейы сабырдзинадтауæг тыхтыл. Уый фæстæ сæ ных сарæзтой, Хуссар Ирыстоны алывæрсты иунæг фæндагмæ. Ууылты цæрджытæ хъавыдысты сæ сывæллæтты Кавказы æфцæджы сæрты Цæгат Ирыстонмæ фæхæццæ кæнын. Саударæн мадзæлттæ райдыдтой абон æхсæвы. Мысæн службæтæ ацыдысты Цæгат æмæ Хуссар Ирыстоны æппæт аргъуанты дæр. Номарæн мадзæлттæ арæзт кæй цæуынц, уымæ гæсгæ рæстæгмæ сæхгæдтой Гуырдзыимæ паддзахадон арæн. Сæ куыст райдайдзысты 9-æм августы.
Хуссар Ирыстоны абон мысынц 2008 азы цаутæ. Сахаты рдæджы размæ Фыдыбæстæ хъахъхъæнджыты цыртдзæвæны цур сæвæртой веноктæ æмæ дидинджытæ. Уый дæр у Судзæггаг цырагъы номарæн акцийы иу хай. Мысæн мадзæлттæ райдыдтой дысон хъыггæнæн бæласы цур дидинджытæ сæвæрынæй, æмæ гом арвы бын сыгъд удты музейы чырыстон Дзуары цур аргъуыдæй.
Æдзард хæстонты ном æрымысынмæ æрбацыд бирæ адæм. Минмæ хæстæг æрæмбырд сты Парламенты асинты цур, ацы хатт дæр дзы равæрдтой, гуырдзиаг агрессорты къухтæй чи фæмард, уыдоны къамтæ.
Номарæн мадзалмæ чи æрбацыд, уыдонмæ сидгæйæ, Хуссар Ирыстоны президент Бибылты Анатолий загъта, Гуырдзыйы раздæры президент Михаил Саакашвилийæ адæмæн цы стыр зиан æрхаста, уый æмбаргæйæ, дунейы æхсæнад дзы хъуамæ бадома дзуапп. Уыимæ раарфæ кодта Уæрæсейы Президент Владимир Путинæн æмæ хицауады сæрдар Дмирий Медведевæн, 2008-æм азы августы Хуссар Ирыстоны адæмæн цы стыр æххуыс бакодтой, æмæ йæ социалон-экономикон райрæзтмæ цы æвæрæн хæссынц, уый фæдыл.
Абон Хуссар Ирыстон рæзы, ам аразынц цæрæнуæттæ æмæ социалон ахсджиаг объекттæ.
