Киноныв æвдисы уæлахизмы зын фæндаг
Хуссар Ирыстоны хæдбардзинады 15 азы бонмæ ист, Хъуысаты Тимуры документалон киноныв «Независимая», равдисдзысты Белоруссийы, Сомихы, Хъырымы, Донецкы адæмон республикæйы æмæ Цæгат Ирыстоны. Киноныв æвдисы уæлахизмы зын фæндаг. Цал æмæ цал зындзинæды сæрты ахызт Хуссар Ирыстон, хæдбардзинад райсыны тыххæй. Геноциды уæззау азтæ, Гуырдзиаг фашизмы ныхмæ тох кæнгæйæ, хуссуирыстойнæгтæ цы хъæбатырдзинад равдыстой, уымæн ис бирæ æвдисæнтæ. Кæй зæгъын æй хъæуы, сæ фарсмæ æрбалæууыд Уæрæсе. Сабырдзинадтауджытæ лæууыдысты нæ фæтасгæйæ, цалынмæ знаджы рдыгæй æвирхъау æмæ æнæнхъæлæджы цæф нæ райстой, уæдмæ. 2008-æм азы август аивта истори. Ралæууыд, адæм рагæй кæмæн бæллыдысты, уыцы сабыр дуне. Ног дуг æмæ ног цард. Документалон кинонывмæ хаст æрцыдысты архивон æрмæджытæ. Хуссар Ирыстоны алы рæстæджыты тох сæ хæдбардзинады сæраппонд. Уымæй дарддæр бынæттон цæрджыты мысинæгтæ, зындгонд политикты интервью. Кинолентæ æвдисдзысты скъолаты æмæ федералон телеканалты. Уæ зæрдыл уын æрлæууын кæндзыстæм, документалон кинонывы премьерæ арæзт æрцыд Цхинвалы, Хуссар Ирыстоны хæдбардзинады бон – 26-æм августы.
