Цæрджытæ ацы цаумæ рагæй æнхъæлмæ кастысты
Адæмы удæнцойдзинадæн. Хуымæллæджы байгом ног амбулатори. Цæрджытæ ацы цаумæ рагæй æнхъæлмæ кастысты. Ныр рынчынты уавæр зынгæ фенцондæр уыдзæн. Медицинон пункт ифтонг у æппæт нырыккон кусæнгæрзтæй. Кадджын мадзалæн æвдисæн уыди Тъехты Элинæ дæр.
Кафт, зард æмæ хъæуы цæрджыты хъæлдзæгдзинад. Хуымæллæджы кадджын уавæры байгом кодтой амбулатори.
Ныр хъæуы цæрджытæн зынгæ фенцондæр уыдзæн. Бызыккаты Маринæ цæры Хуымæллæджы. Йæхи цас зоны, уыййас сæ хъæуы амбулатори алкæддæр уыд заууат уавæры, фæлæ йын æндæр хъæумæ ацæуыны фадат нæ уыд. Ныр æм медицинон лæггæдтæ уыдзысты хæстæг.
Бызыккаты Маринæ, Хуымæллæджы цæрæг: «Нырмæ дæр нæм уыд амбулатори, фæлæ уыд тынг зæронд. Кусджытæн сæ бон куыд уыд, афтæ нын æххуыс кодтой. Ныр нæм уыдзæн нæхи амбулатори æмæ зæрдæ дарæм, нæ медицинон лæггæддæ кæй фæхуыздæр уыдзысты, ууыл».
Цæмæй медицинон æххуыс райсой, уый тыххæй хъæуы цæрджыты хъуыд Беслæнмæ цæуын, фæлæ, кæй зæгъын æй хъæуы, транспорт алкæмæ нæй. Цæлойты Чермен рагæй фыста курдиаттæ уæлдæр инстанцитæм. Ныр йæ фæндон сæххæст æмæ йæ цинæн кæрон нæй – зæгъы нæлгоймаг.
Цæлойты Чермен, Хъæуы цæрæг: «Хуымæллæджы цæрджытæ ног амбулаторимæ рагæй æнхъæлмæ кастысты. Зæронд амбулатори фæстаг 20 азы уыд тынг æвзæр уавæры, фæлæ йæ кусджытæ уæддæр зæрдиагæй архайдтой, цæмæй æххуысагур адæмæн балæггад кæной. Кæй зæгъын æй хъæуы, хъæуы цæрджытæ æххуыс хъуаг никуы уыдысты. Хъуыдис æрмæстдæр уавæртæ фæхуызлæр кæнын».
Зæронд амбулаторийы уыд зын куыд рынчынтæн, афтæ дохтыртæн сæхицæн дæр. Кусын сæ хъуыд къуындæг кабинетты. Фæлæ зын уавæрты йæ профессионалон дæсныйад цы дохтыртæ равдыстой, уыдон ныр кусынц ног бæстыхайы.
Амбулаторийы хъæддзаума иууылдæр у ног. Ацы процедурон кабинет у сывæллæттæн. Санитарон домæнтæ иууылдæр сты æххæстгонд. Ис дзы тагъд æххуысы препараттæн скъайпп стæй, кæй зæгъын æй хъæуы, ног æмæ пайда кæмæй скодтой, уыцы сидзинтæн хицæн къоппытæ.
Рынчынтæн лæггад кæндзысты терапевт, педиатр, 3 медицинон хойы æмæ сылгоймæгты дохтыр. Уымæй уæлдай ма Хуымæллæгмæ рæстæгмæ цæудзысты амбулаторийы цы специалисттæ нæ уа, уыдон.
Адырхаты Алан, Рахизфарсы районы рынчындоны сæйраг дохтыр: «Хуымæллæджы зæронд амбулаторийы фезмæлæнтæ дæр къаннæг уыдысты. Ног амбулаторийы ис бирæ фадæттæ. Ис дзы ног оборудовани. Ныр дзы парахатæй кусдзысты. Уæдæ рынчынтæн дæр уыдзæн бирæ æнцондæр. Рынчынты Беслæнмæ цæуын нал хъæудзæн».
Ног амбулаторимæ æрбацыдысты РЦИ-А хицауады сæрдары хæдивæг Александр Реутов, æнæниздзинадхъахъхъæнынады министр Тебиаты Сослан æмæ рахизфарсы районы цæнтрон рынчындоны минæвæрттæ. Зæронд амбулатори уыд гыццыл фалдæр. Ныр та йæ самадтой адæмæн æнцондæр цæуын кæдæм у, уыцы ран. Куыстытæ райдыдтой æнæниздзинадхъахъхъæнынады модернизацимæ гæсгæ 2021 азы, апрелы.
Бæстыхайы медицинон æххуыс райсæн уыдзæн 50 адæймагæй фылдæрæн. Зæгъын ма хъæуы уый дæр, æмæ фарон модернизацийы программæмæ гæсгæ амбулаторийæн рахай кодтой тагъд æххуысы машинæ.
