Фидар бастдзинæдтæн ис бирæ æвдисæндартæ
Хъырымы æмæ Цæгат Ирыстоны хъысмæт сбаста историон цаутæй. Фидар бастдзинæдтæн ис бирæ æвдисæндартæ. Æмæ та ныр дæр афтæ. Фарныхъæумæ уазджытæ ссиди Севастополæй. Делегацийы бафæндыд, Фарныхъæуы скъолаимæ бастдзинæдтæ фенгомдæр кæнын. Уæлдай тынгдæр та сæ фæндыд фыццаг ирыстойнаг сылгоймаг тæхæг Дауыраты Илитæйы хæстæджытимæ базонгæ уæвын. Фембæлд рауад хъæрмуд. Не мзæххонтæ уазджытæн зæрдæ бавæрдтой, Дауыраты Илитæимæ баст хæстон æрмæджытæ балæвар кæнынæй. Мадзал бабæрæг кодта не сфæлдыстадон къорд дæр.
Дауыраты мыггаджы минæвæрттæ, Фарныхъæуы хистæртæ, скъоладзаутæ, æвзонг æфсæддонтæ. Хъæуы æцæг бæрæгбон. Се ппæт дæр æрæмбырд сты Дауыраты Илитæйы цыртдзæвæны раз. Фыццаг ирыстойнаг сылгоймаг тæхæгæн цыртдзæвæн ам сæвæрдтой 2020-æм азы. Ныр зæрдиагæй æнхъæлмæ касынц дард Севастополæй уазджытæм. Севастополы 42-æм скъолайы музейы разамонæг Елена Дроздюк æмæ директоры хæдивæг Эльвиса Мефаева сæ бинонтимæ ссыдысты Цæгат Ирыстонмæ Фарныхъæумæ. Хъырымы æрдæгсакъадах æмæ Цæгат Ирыстон баст сты фидар æмæ æнгом ахастдзинæдтæй.
Севастополы 42-æм скъолайы музей хæссы ногдзау-хъæбатыр Валерий Волковы ном. Фыдыбæстæйы Стыр хæсты райдиан ыл цыди æрмæстдæр 13 азы. Афтæмæй службæ кодта денджызон фистæгæфсæддонты 7-æм бригады, æмæ хъæбатырæй фæмард Севастополь хъахъхъæнгæйæ.
Севастополы скъолайы цæстыгагуыйау хъахъхъæнынц æппæт хъæбатырты тыххæй истори. Уыдоны хсæн Валерий Волков æмæ Дауыраты Илитæ дæр. Делегаци ссыди, цæмæй Фарныхъæуы скъолаимæ бастдзинæдтæ фенгомдæр кæной, уый тыххæй. Уæлдай тынгдæр та сæ фæндыд Дауыраты Илитæйы хæстæджытимæ базонгæ уæвын, æмæ семæ аныхас кæнын.
Фарныхъæуы музейæн делегацйы минæвæрттæ балæвар кодтой Валерий Волковы бюст æмæ æфсæддон худ. Цæгатирыстойнаг минæвæрттæ та уазджытæн зæрдæ бавæрдтой, Фыдыбæстæйы Стыр хæсты рæстæгæй Илитæйы къухфыстытæ балæвар кæнынæй. Фæлæ уал уый размæ уыдонæй ныммыхуыр кæндзысты чиныг.
