Культурæйы аз æххæст кæнгæйæ нæ республикæмæ ссыд Игорь Моисеевы номыл адæмон кафты хъуыстгонд ансамбль. Цæгат Ирыстонмæ ссыдысты балеты 82 артисты. Зындгонд кафджыты
Молдавайнаг «Хора Чиокырмия Жок», аджайраг æфсæддон «Хорум», хъалмыхъхъаг нæлгоймæгты, тæтæйраг æмæ æндæр адæмыхæттыты кæфтытæ радон хатт дисы бафтыдтой аивадуарзджыты. Ацы изæр ирон театрмæ Игорь Моисеевы номыл паддзахадон академион ансамблы концертмæ æрбацыд бирæ адæм.
Дзæхойты Зæлинæ, РЦИ-Аланийы сгуыхт артисткæ: «Фыццаг хатт сæ нæ уынын. Фæлæ афишæтæ куы федтон, уæд хъуамæ куыд нæ æрбацыдаин с концертмæ. Æмæ æрбацыдыстæм. Тынг хорз артисттæ сты, сæ кой айхъуыст æгас дунейыл. Ирыстоны аивадуарзджыты зæрдæмæ дæр кæй фæцæудзысты, уый дæр мæ уырны».
Коллективы 82 артисты адæмæн нæ бавгъау кодтой сæ курдиат. Сæ къуыхы айст, сæ цыд, суанг ма сæ цæстæнгасæй дæр æвдыстой, хуымæтæджы кафт кæй нæ кæнынц, уый, фæлæ кæй æвдисынц, цы адæмы кафт кæнынц, уыдоны миддуне æмæ культурæ, сæ кафты хъæздыгдзинад. Иу кафт ивта иннæйы. Адæм сæм кæсынæй не фсæстысты. Фæлæ сын ахæм æхсызгон лæвар скæндзысты, уый æнæхъæл дæр ничи уыд. Моисеевы номыл ансамбль акодта хонгæ кафт.
Ансамбль фыццаг хатт не ссыд Ирыстонмæ. Фæлæ сын ирыстойнаг аивадуарзджытимæ радон фембæлд алы хатт дæр æхсызгон вæййы.
Евгения Панкова, Игорь Моисеевы номыл паддзахадон академион ансамблы солисткæ: «Тынг разы стæм ногæй та Ирыстонмæ кæй ссыдыстæм, уый. Алы хатт дæр ныл зæрдиагæй сæмбæлынц. Ирыстоны цæрджытæ нæ уарзынц, уый уынæм æмæ нын æхсызгон у».
Александр Тихонов, УФ-йы сгуыхт артист: «Мæнмæ гæсгæ, ирыстойнаг аивадуарзджытæ хицæн кæнынц. Зæрдæхæлар, æргом, аивад дæр кæй уарзынц, уый бæрæг у. æмæ алы хатт дæр зæрдиагæй ссæууæм Ирыстонмæ».
Артистты ныхæстæм гæсгæ ма ансамблы Игорь Моисеев куы куыста, уæд сæ репертуары уыд кафт «Симд». Ансамблы директор æмæ аивадон разамонæг Елена Щербаковайы ныхæстæм гæсгæ, гæнæн ис æмæ йæ сног кæной, чи зоны æмæ æвæрд æрцæудзæн æндæр кафт дæр.
Ныр та уал дунейы аивадуарзджытæн циндзинад хæссынц се сфæлдыстадон арæхстдзинадæй. Кафджыты дæсныйад та афтæ бæрзонд у, æмæ концертмæ чи рбацыд, уыдоны-иу сæ сценæйæ дæр нал уагътой.
Ансамблæн уыдзæн æртæ концерты. Дыууæ боны кафджытæ сæ арæхстдзинад æвдисдзысты Ирон академион театры. Æртыккаг концертæн ис хæрзаудæн нысан, æмæ йæ райсом ратдзысты Беслæны.
Зыхъуаты Жаннæ
