«Хæлардзинады арт». Ахæм сæргондимæ бæрæгбон арæзт æрцыд ихын галуаны. Бацæттæ йæ кодта республикæйы национ ахастдзинæдты фарстаты фæдыл министрад.
Кæд Сочийы олимпаг хъæзтыты цæгатирыстойнаг спортсментæ нæ архайы, уæддæр Дзæуджыхъæуы сфæнд кодтой уыцы бæрæгбон сбæрæг кæнын. Адæмты иудзинад равдисын – уый у проект «Хæлардзинады арт» -ы сæйраг нысан. Арæзт æрцыд национ ахастдзинæдты фарстаты фæдыл министрады хъæппæрисæй. Ихын галуаны канд спортсментæ нæ уыдысты. Национ-культурон æхсæнадты минæвæрттæ акодтой сæ мадæлон æвзагыл зарджытæ.
Бæрæгбон сæ курдиатæй саив кодтой æвзонг фигуристкæтæ. Тулойты Аланæ спорты ацы хуызæй архайы 5-æм аз. Ныридæгæн уыдис алыхуызон регионалон æмæ æппæтуæрæсеон турнирты. Фидæнмæ йæм ис стыр фæндтæ. Æнæмæнг баст сты ацы спортимæ.
Тулойты Аланæ: «Æз фæкæсын телевизорæй олимпиадæмæ. Мæ зæрдæмæ цæуынц Евгений Плющенко æмæ Юлия Лепницкая. Мæн дæр фæнды уыдоны хуызæн кафын».
Зымæгон спорты хуызты скъолайы директор Фидараты Асланы уырны, уыцы бæллицтæ кæй сæххæст уыдзысты, уый. Куыд зæгъы, афтæмæй, кæд ихын галуан республикæйы æрмæстдæр 7 азы размæ фæзынд, уæддæр спортсментæ цы бæрæггæннæтæ æвдисынц, уыдон ныфс дæттынц, республикæйы олимпаг хæрзиуджыты хсæн, зымæгон спорты хуызтæй майдантæ дæр кæй фæзындзæн, уымæй.
Фидараты Аслан, РЦИ-Аланийы зымæгон спорты хуызты скъолайы директор: «Нæ сабиты ныртæккæ Сочийы сты, кæсынц хистæртæм. Уырдыгæй сласдзысты ныфс, æмæ мах фæнды, цæмæй 10-15 азы фæстæ уой олимпиадæйы. Чызджытæн дæр, хоккеисттæн дæр сæ бон у æмæ хъаздзысты».
Ихыл сæ арæхстдзинад равдыстой æвзонг хоккеисттæ дæр. Командæтæ «Снежный барс» æмæ «Алани» адæмы зæрдæтæ бахъæлдзæг кодтой цымыдисаг хъазтæй. Йæ хатдзæгтæм гæсгæ фæуæлахиз сты «Алани»-йы хокеисттæ. Дыууæ командæйæн дæр радтой кубоктæ æмæ зæрдылдарæн лæвæрттæ. Бæрæгбоны кæронбæттæны ихмæ къахдзоныгътыл национ костюмты рацыдысты республикæйы культурон центрты минæвæрттæ, сæ къухты Уæрæсейы æмæ Ирыстоны тырысатæ, афтæмæй.
Хъайтмазты Дзерассæ
