Дзæуджыхъæуы муниципалон сконды сæргълæууæг ын раарфæ кодта, не мзæххон Персаты Арнеллæйæн кæй æххуыс кæны, æмæ хæрзаудæн куыст кæй кæны, уый тыххæй
Дзæуджыхъæуы муниципалон сконды сæргълæууæг Икъаты Русланбег фембæлд хъуыстгонд уæрæсейаг спортивон блогер Евгений Савинимæ. Уый ацы бонты ис Цæгат Ирыстоны. Икъаты Русланбег ын раарфæ кодта, не мзæххон Персаты Арнеллæйæн кæй æххуыс кæны, æмæ хæрзаудæн куыст кæй кæны, уый тыххæй. Кадджын уазæгæн радта кады гæххæтт æмæ йын ракодта зæрдылдарæн лæвар. Дзæуджыхъæуы сæргълæууæг куыд загъта, афтæмæй Евгенийы хуызæн зæрдæхæлар адæмы фæрцы чысыл Арнеллæйæн фадат фæзынд æнæниз цард кæнынæн. Бузныг, искæйы зындзинадмæ куыдфæндыйы цæстæй кæй нæ кæсыс, уый тыххæй. Ирыстоны дæм кæддæриддæр зæрдиагæй æнхъæлмæ кæсдзысты, загъта Икъаты Русланбег. Йæхи рдыгæй Евгений Савин бафиппайдта, гыццыл чызг йæхæдæг дæр кæй бацархайдта йæхи сдзæбæх кæнынынл. Бæлвырддæр та – баиу кодта бирæ дзыллæты. Уыимæ се ппæт дæр сты алы къабæзтæй, фæлæ сæ иу кодта хорздзинад ракæныны фæндон. Кæронбæттæны Икъаты Русланбег зындгонд футболистæй ракуырдта, цæмæй пуртийыл ныууадза йæ къухфыст. Уыцы пурти балæвар кæндзысты Дзæуджыхъæуы футболон клуб «Барс»-ы хъомылгæнинæгтæн.
Уæ зæрдыл уын æрлæууын кæндзыстæм, Евгений Савин Персаты Арнеллæйæн радих кодта 500 мин сомы. Уымæй дарддæр ма хæрзаудæн акцимæ бафтыдта бирæ зындгонд футболистты æмæ зæрдæхæлар адæмы. Дзæуджыхъæумæ Евгений Савин ссыди Персаты Арнеллæйы бинонты хуындмæ гæсгæ.
