«Импорт кæй баурæдтой, уый ахъаз уыдзæн бæстæйы хъæууон хæдзарады рæзтæн». Мамсыраты Таймураз йæ хъуыдытæ загъта бæстæйы президент Владимир Путины бардзырды фæдыл.
Уымæ гæсгæ Уæрæсемæ нал ис хъæууонхæдзарадон продукци æмæ хойрæгтæ ласынæн бар фæсарæнтæй – Европæйаг цæдисы бæстæтæй, Америкæйæ, Австралийæ, Канадæйæ æмæ Норвегийæ.
Цæгат Ирыстоны сæргълæууæг Мамсыраты Таймураз загъта: «Ацы акт фидаргонд кæй æрцыд, уый æххуыс уыдзæн республикæмæ æрбаздахын уæлæмхасæн фæрæзтæ. Сæрмагондæй та, ахъаз уыдзæн агропромышленнон комплексы архайд фæхуыздæр кæнынæн, ног куысты бынæттæ аразынæн. Цæгат Ирыстоны хицауадæн бабар кодтой, импорты бæсты нæ бон дуканитæ цæмæй баххæст кæнын у, уый сбæлвырд кæнын. Сæрмагондæй та – маргъы фыд, кæсаг, дыргътæ æмæ халсартæ. Фæнды нæ хъæууон хæдзарадмæ цæстдарды федералон службæмæ курдиат бахæссын, цæмæй Уæрæсемæ Хуссар Ирыстонæй продукци ласыны фæтк фæхуымæтæгдæр кæной».
