Цæгат Ирыстоны паддзахадон университеты кусы сæрмагонд лаборатори. Уым бакуыстой мультимедион программæтыл, æмæ сæ фæрцы ис дæрддзæфмæ ахуырад райсын.
Ног компьютерон мультимедион программæтæ, дæрддзæфмæ ахуырад… Кæддæр диссагыл цы хъуыддаг банымайæн уыд, уый ныр бынат ссардта не рвылбоны царды. Ахуырад та æнæ ног технологитæй фидаугæ дæр нал кæны.
Цæгат Ирыстоны паддзахадон университеты парахатæй пайда кæнæныц инновацион технологитæй.
Годжыцаты Ольгæ, ЦИПУ-йы ахуырадон инновацион технологиты лабораторийы сæргълæууæг: «Студенттæн ахæм ногдзинад стыр пайда у. Зæгъæм, лекцитæм æмæ практикон ахуыртæм йæ бон цæуын кæмæн нæу, уыдонæн инновацион технологитæ фадат дæттынц дардмæ ахуыр кæнынæн. Æмæ алкæй бон дæр у хæрзхъæд, арф зонындзинæдтæ райсын. Хуыздæр базонын цы ахуыр кæны, уыцы æрмæджытæ».
Ног технологитыл кусæг специалистты иумæйаг хъуыды у ахæм – дæрддзæфмæ ахуырад кæндзæн парахатдæр. Ныртæккæ университеты сайтмæ бахастой ногдзинад Moodle. Хаст æм æрцæудзысты, ахуыры рæстæг студенттæн цы æрмæджытæ бацамыдтой, лекциты сын цы бакастысты, семинарты цы цыдысты, уыдон иууылдæр. Афтæмæй, исты аххоссæгтæм гæсгæ йæ бон ахуырмæ цæуын кæмæн нæ уыд, чи фæцух кодта, уыдонæн хæдзары дæр сæ бон уыдзæн хъæугæ æрмæджытæ бакæсын æмæ сахуыр кæнын. Уый нæ, фæлæ ма сæ зонындзинæдтæ сæ бон у тестты хуызы сбæрæг кæнын дæр.
Ныртæккæ лабораторийы кусынц тестты хæслæвæрдтæ саразыныл, кусынц электрон лекцитыл. Цæмæй сæ архайды мацы къуылымпытæ уа, уый тыххæй лабораторийы ахуыргæнджытæн аразынц сæрмагонд ахуыртæ.
Наталья Тимошкина, ЦИПУ-йы ахуырадон инновацион технологиты лабораторийы хистæр наукон кусæг: «Æппæты фыццаг ног технологитæй пайда кæнын мах хъуамæ сахуыр кæнæм ахуыргæнджыты. Уымæ гæсгæ сын сарæзтам ахуырадон курсытæ. Алы факультеты кусджытæн сæм сæ бон цæуын у декабрæй фæстæмæ».
Лабораторийы ма кусынц ног мультимедион электрон программæтæ саразыныл дæр. Ныридæгæн уал бацæттæ кодтой цалдæр. Мультимедион энциклопедитæ, Ирыстоны æрдз æмæ кувæн бынæтты тыххæй æрмæджытæ тагъд фæзындзысты скъолаты ахуырадон программæты.
Проект ма фадат дæтты университеты кусджытæн сæхи эксперименталон ахуырадон программæтæ аразынæн, сæрмагонд пълантæ скæнынæн, сæ фæлтæрдзинадимæ зонгæ кæнынæн.
Инновацион технологитæ аразджыты хъуыдымæ гæсгæ, сæ лабораторон иртæстыты фæрцы фæхуыздæр уыдзæн ахуыргæнджыты куыст, сæ бон уыдзæн сæ зонындзинæдтæ фæфылдæр кæнын. Уый та æнæмæнг фæзындзæн студентты цæттæдзинадыл.
Зыхъуаты Жаннæ
