Федералон закъоны проектимæ сразы сты Парламенты Советы æмбырды
Инвалид-сывæллæттæм æмæ 1-аг къорды инвалидтæм цы æгуыст адæм сæ цæст дарынц, уыдонæн фиддоны бæрц 2023-æм азы 1-æм январæй гæнæн ис æмæ суыдзæн 13 мин сомы. Федералон закъоны проектимæ сразы сты Парламенты Советы æмбырды. Фиддон цас уыдзæн, уый снысан кодтой, ацы аз мызд фидыны æппынкъаддæры бæрц хынцгæйæ. Депутаттæ ма æрныхас кодтой фæллойы кодексмæ ивддзинæдтæ бахæссыныл дæр. Сæ фæрцы 1-аг æмæ 2-аг къорды инвалидтæм чи кæсы, уыдонæн уыдзæн мæй 4 уæлæмхасæн фæлладуадзæн боны райсыны фадат, цалынмæ инвалидыл 23 азы сæххæст уа, уæдмæ. Æркастысты ма Татарстаны парламентариты фæндонмæ дæр. Уымæ гæсгæ хъæуты æдзух чи цæры, ахæм сылгоймæгтæн 3-аг сывæллон куы райгуыра, уæд сын æмбæлдзæн иу хатт райсын сæрмагонд фиддон. Проекты авторты хъуыдымæ гæсгæ, уый хорзырдæм фæзындзæн демографион уавæрыл. Советы уæнгтæ ма хорзыл банымадтой, хæдзарон æмæ дзæгъæл цæрæгойты иумæйаг информацион базæ саразын. Хаст æрцæудзæн паддзахадон информацион системæтæм, æмæ æххуыс уыдзæн, цæрæгой куы фесæфа, уæд æй æнцондæрæй ссарынæн.
