Дзæуджыхъæуы цæрджытæн иу ранæй иннæмæ ацæуынæн стыр фæрæз у – æхсæнадон транспорт. Тынг чи тагъд кæны, уый бон та у такси баххуырсын. Зындæр уавæры сты инвалидтæ. Иуæй – пандустæ алы ран не сты
Дзæуджыхъæуы цæрджытæн иу ранæй иннæмæ
ацæуынæн стыр фæрæз у – æхсæнадон транспорт. Тынг чи тагъд кæны, уый бон
та у такси баххуырсын.
Зындæр уавæры сты инвалидтæ. Иуæй – пандустæ алы ран не сты, иннæмæй сын
сæрмагонд æрлæууæн бынæттæ нæй. Такситæ та сæ уæвгæ дæр нæ комынц
ласын. Кæд сразы уой, уæд дæр дывæр аргъыл.
Такситы фирмæтæм фыццаг хатт бадзургæйæ,
инвалиды аласынмæ, стæм шофыр сразы вæййы. Машинæ инвалиды хъæуы, уый,
куы фехъусынц, уæд раттынц дзуапп – иннæ фирмæмæ бадзурут, загъгæ… Плиты
Жаннæ, уыцы хъуыддагимæ арæх æмбæлы.
Плиты Жаннæ: «Цалдæр хатты бадзырдтон
такситæм æмæ иу уыд афтæ æмæ нæ куымттой ласын. Чи тæрсы йæ машинæ йын
куы счъизи кæной, уымæй. Чи тæрсы куы йын æй ныххафой. Чи та æфсон скæны
багажник дам мæм нæй. Раст зæгъгæйæ кæмæндæрты коляскæтæ æцæгæй дæр нæ
фæцæуынц сæ машинæты».
Йе нæниздзинад хъыгдард кæмæн у,
уæлдайдæр та инвалидты коляскæтыл чи цæуы, уыдон искуыдæм ацæуын куы
бахъæуы, уæд уæлдай зындзинæдтæ феййафынц. Дæхи æгъдауæй дард нæ
ацæудзынæ, машинæ баххуырсын та – тынг зын у. Уæвгæ цы цæлхдуртыл
æмбæлынц, уыдон бирæ сты. Зæгъæм, Уæрæсейы Федерацийы сæйраг тæрхондон
авиакомпанитæн бар радта хæдтæгджытыл инвалидты ма ласын. Цæгат Ирыстоны
инвалидты реабилитацион центры хицау Цæллагкаты Жаннæйы ныхæстæм гæсгæ,
сæйраг аххоссаг у, адæмы зондахаст æмæ цæстæнгас инвалидтæм кæй нæ ивы,
уый.
Цæллагкаты Жаннæ, Цæгат Ирыстоны
инвалидты реабилитацион центры хицау: 8.43 «Машинæмæ куы бадзурай æмæ
дæм куы æрбацæуа, уæд дын дæ коляскæ куы фены, уæд дæ афæрсы: «Æмæ дын
дæ коляскæ та цы фæкæнон?» Куы йын зæгъай дæ багажничы йæ сывæр, зæгъгæ,
уæд мын дзы бынат нæй зæгъгæ, фæкæнынц. Æмæ мæ бафæрсын фæнды, кæд дæм
бынат нæй, уæд цавæр ласæг дæ. Адæймаг кæм базарæй рацæуы, кæм æй истытæ
ласын фæхъæуы…. Æмæ хъуамæ цы фæуа?! Кæд машинæты ахæм бынæттæ нæй, уæд
сæ сæ хицæуттæ цæуыннæ зонынц. Куыд сæ рауадзынц афтæмæй фæндæгтæм?
Хицауад сæм цæуыннæ кæсынц. Хъуамæ сæм сæ цæст ма дарой?».
Социалон роликтæ, сæрмагонд программæтæ
æмæ закъоны проекттæ дзурынц, адæмы се нæниздзинадмæ гæсгæ дих кæнын кæй
нæ хъæуы, ууыл. Инвалидтæн куысты бынæттæ дæттыны тыххæй дæр ис закъон.
Фæлæ уый куыд сæххæст кæнæн ис? Ууыл ничи ма ахъуыды кодта. Кæм æмæ сын
цавæр куыст дæттынц? Куыд хъуамæ бахæццæ уой сæ кусæн бынæттæм?
Лыггæнинаг фарстатæ ма сты тынг бирæ…
Инвалиддтæн баххуыс кæнынæн Европæйы
бирæ бæстæты кусын райдыдта социалон такси. Мæскуыйы транспорты ацы
хуызæй пайда кæнынц ныр 10 азæй фылдæр. Волгодонскы 3 азы. Цæгат
Ирыстоны инвалидтæ, уыцы социалон лæггад цы у, уый нæма зонынц.
Инвалид æнæ транспортæй цавæр
зындзинæдтимæ æмбæлы, уый Тыбылаты Иринæйæн æнæзонгæ нæу. Фæндаггон
фыдбылызы куы бахауд, уæд дохтырты бон фидарæй зæгъын нæ уыд, йæ къæхтыл
ма слæудзæн æви нæ, уый. Ныр æй хорз æмбары, æмбæлгæ транспорт
инвалидæн цы стыр æххуыс у уый. Иринæмæ фæзынд йæхи машинæ, у йын стыр
удæнцой. Фæлæ йæ машинæ кæм сæвæры, уый арæх нæ вæййы.
Горæты инвалидтæн цы æрлæууæн бынæттæ
скæнынц, уыдон фылдæр хатт уæгъд нæ вæййынц, иннæтæ дзы сæвæрынц сæ
машинæтæ. Афтæмæй та горæтарæзæн кодексы домæнтæм гæсгæ, алы бæстыхайы
дæр инвалидтæн хъуамæ уой сæрмагонд бацæуæнтæ, пандустæ. Фæлæ арæх уыцы
хъуыддаг æмæ домæнтæ гæххæттыл фыстæй баззайынц.
Зыхъуаты Жаннæ
