Уыцы рæстæгмæ бирæ ахсджиаг хъуыддæгтæ æххæстгонд æрцыд
Инвалидты æппæтуæрæсеон æхсæнад сбæрæг кодта йе 35 азы юбилей. Уыцы рæстæгмæ бирæ ахсджиаг хъуыддæгтæ æххæстгонд æрцыд. Адæм сæ риссаг фарстатимæ æрбацæуынц æхсæнады регионалон хайадмæ, æмæ уым кæддæриддæр ссарынц æмбарындзинад. Организацийы архайынц, фæкæсын кæмæ хъæуы, уыцы адæмæн алывæрсыг æххуыс кæныныл, сæйрагдæр та – дарддæр цæрынæн ныфс радтыныл. Бæлвырддæр радзурдзæн Хъайтмазты Дзерассæ.
Поэт, активист, спортсмен æмæ фидар уды хицау. Уый алцыдæр Олеся Янбухтинæйы тыххæй. Чызгмæ ис сывæллæтты церебралон паралич, фæлæ йæ уый нæ хъыгдары размæ тырнын æмæ йæхиуыл кусын. Олеся поэзиимæ базонгæ æвзонг чызгæй. Хъуыды кæны, фыццаг æмдзæвгæтæ куыд каст, фæстæдæр та йæхæдæг дæр куыд райдыдта фыссын, уый. Куыд зæгъы, афтæмæй йын сфæлдыстад кæддæриддæр æххуыс кодта. Йæ куыстытæ рахаста инвалидты æппæтæуæрæсеон æхсæнады цæгатирыстойнаг организацийы минæвæртты размæ. Чызджы поэзийæн стыр аргъ скодтой. Баххуыс ын кодтой æппæтадæмон конкурсы архайын. Олеся сси преми «Филантроп»-ы лауреат.
Æрæджы дæр ма Олеся архайдта рог атлетикæйæ ерысты, йе *нæниздзинад хъыгдард кæмæн у, ахæм адæмы *хсæн. Фæлæ рæстæгимæ йæхи æвзæрдæр æнкъарын райдыдта. Æнхъæл дæр нæ уыд, инвалидон коляскæмæ баст кæй уыдзæн. Спортивон мадзæлтты архайыны фадат ын нæма ис. Йæ рæстæг Олеся нывонд кæны поэзийæн, стæй ма иу ахсджиаг хъуыддагæн – йе *нæниздзинад хъыгдард кæмæн, уыцы адæмæн æххуысæн. Инвалидты æхсæнады минæвæрттимæ Олеся арæзта фембæлдтытæ, йæхи дæнцæгæй æвдыста, зындзинæдты сæрты хизгæйæ кæй хъæуы архайын, æххæст цардæй цæрын. Зындзинæдтæ нæ хынцгæйæ, йæ къухтæ чи не *руагъта, иу ахæм адæймаг ма у Олег Попов. 20 азæй фылдæры размæ донмæ ныггæппгæнгæйæ йæ астæуыстæг асаст. Уæдæй фæстæмæ Олег цæуы инвалидон коляскæйы фæрцы. Йæ ныфс нæ асаст. Райдыдта ныв кæнын. Инвалидты æппæтæуæрæсеон æхсæнады цæгатирыстойнаг организацийы минæвæрттæ нæлгоймагæн баххуыс кодтой саразын 15 сæрмагонд равдысты бæстæйы алы горæтты. Йæ куыстыты тыххæй Олег Поповæн саккаг кодтой 2 æппæтадæмон премийы аивады къабазы. Олег куыд зæгъы, афтæмæй йе сфæлдыстады сæйраг уæлкурдиат сты йæ бинонтæ.
Ныр 35 азы инвалидты æхсæнад адæмæн æххуыс кæны, æрмæст цæрын нæ, фæлæ ма размæ цæуын дæр. Фæстаг 5 азмæ республикон организаци фæкаст мин инвалидæй фылдæрмæ. Æдзухдæр куыст цæуы алывæрсыг фарстаты фæдыл. Се *хсæн медицинон æххуыс, социалон лæггæдтæ исын æмæ сфæлдыстадон гæнæнтæ æххæст кæнын.
35 азмæ чысыл ахсджиаг хъуыддæгтæ конд не рцыд. Организацимæ ис стыр фæлтæрддзинад. Уый фæрцы йæ бон уыдзæн дарддæр йæ куыст æнтыстджынæй æххæст кæнын
