Куыд цæттæ кæнынц йæ бинонтæ Джеоргуыбайы къуыримæ, уый федта не сфæлдыстадон къорд
Уæдæ ирон æгъдаумæ гæсгæ бæрæгбон арæзт æрцыд Джызæлы дæр. Уым нæ фыдæлты æгъдæуттæ зæрдиагæй хъахъхъæнынц, æмæ сæ архайынц рæзгæ фæлтæрмæ хæццæ кæныныл дæр. Хуыцаубоны вæййы галæргæвдæн, стæй уæд æнæхъæн къуыри хистæртæ фæкувынц хуыцаумæ. Уыимæ фыдæлты æгъдæуттæ æххæст кæнынц алы хæдзары дæр. Се хсæн – Джызæлы цæрæг Солтанты Батразы хæдзар дæр. Куыд цæттæ кæнынц йæ бинонтæ Джеоргуыбайы къуыримæ, уый федта не сфæлдыстадон къорд. Бæлвырддæр хабæрттæ радзурдзæн Тъехты Элинæ.
Джеоргуыбамæ Солтанты бинонтæ цæттæ кæнынц тынг зæрдиагæй. Хистæртæ кæнынц кусарт, хæдзары фсинтæ та цæттæ кæнынц фынг. Солтанты Батраз алы аз дæр аргæвды гал. Куыд зæгъы, афтæмæй йæ хæдзары уыцы кадджын бæрæгбон бæрзонд æвæрд у. Куысты тыххæй йын ацы аз гал йæ хæдзары схæссын нæ бантыст, фæлæ йæ уæддæр балхæдта, цæмæй туг йæ хæдзары суадза, уый тыххæй.
Солтанты Батраз, Джызæлы цæрæг: «Джеоргубайы бонтæй абон у фыццаг бон. Ахъазгæнæг уæд алы хæдзары дæр. Рынчын чи у, уый дæр тагъд рæстæджы адзæбæх уæд. Бæрæгбон сеппæтæн дæр æнæниздзинад æрбахæссæд. Мæ фыд дæр æмæ сыхæгтæ дæр сæхи тынг цæттæ кодтой. Иумæ-иу бадтысты хистæртæ æмæ-иу уынаффæ кодтой».
Кæй зæгъын æй хъæуы, мигæнæнтæ дæр ын сты сæрмагонд. Кæцыдæр кæрдтæй фæархайы хæдзары, æртæ карды та бафснайы сæрмагонд бынаты, æмæ сæ райсы æрмæстдæр куывдты, чындзæхсæвты æмæ æндæр циндзинæдты. Афтæ йæ сыхæгтæ дæр.
Æгъдаумæ гæсгæ кусарт кæныны размæ скувынц Хуыцаумæ, уый фæстæ та фæархайныц нывонд галимæ. Уыцы æппæт хъуыддæгтæм лæмбынæгæй кæсынц кæстæртæ, цæмæй галæргæвдæны æгъдæуттæ иууылдæр бахъуыды кæной, уый тыххæй.
Хистæрты алы фезмæлдмæ дæр кæсынц кæстæртæ. Фанды сæ базонын, фыдæлты æгъдæуттæ куыд æххæстгæнгæ сты, уый. Цæмæй сæ уыдон дæр сæ рæстæджы фæхæццæ кæной ног фæлтæртæм.
Хъыгагæн, раздæримæ абаргæйæ кусæрттæ бирæ хæдзæрттæ нал кæнынц. Солтанты Хъазыбег у Батразы сыхаг. Æрбацыд, цæмæй йæм кусарт кæнынмæ фæкæса. Куыд зæгъы, афтæмæй раздæр фæсивæд къордгай адих сты, æмæ цыдысты хæдзæрттæм æххуыс кæнынмæ. Уæдæ цалынмæ нæлгоймæгтæ чъылдынмæ куыд архайынц, уымæ лæппутæ кæсынц, уæдмæ хæдзары фсинтæн фынг æвæрынмæ æххуыс кæнынц гыццыл чызджытæ. Алы хæдзар къуырийы иу бон равзары æмæ скæны йæ бæрæгбон. Æрбамбырд кæны сыхæгты æмæ скувынц Хуыцаумæ. Ирон адæммæ кæддæриддæр уыдысты уыцы æгъдæуттæ, æмæ сæ рох кæнын нæ хъæуы.
