Автор Таутиаты Азæйы ныхæстæм гæсгæ, ныртæккæ ацы хъуыддаджы фæдыл ныхас цæуы музейы разамындимæ
Ирон æрмдæсныйы конд, æфсæддон лæджы дыууæ метры сурæт, гæнæн ис, æмæ фæзындзæн Лиссабоны музейтæй иуы. Автор Таутиаты Азæйы ныхæстæм гæсгæ, ныртæккæ ацы хъуыддаджы фæдыл ныхас цæуы музейы разамындимæ. Кукла ифтонг уыдзæни фат æмæ рдынæй, уыдон та сарæзтой Венгрийы. Æфсæддоны сурæтыл куыст цыди афæдзæй фылдæр. Бирæтæ йæ фыццаг бакастæй банымайынц æгас адæймагыл.
Полимерон пластикæй конд Сæрмæтты æфсæддон. Къухдæснытæ Таутиаты Азæ æмæ Хуытъинаты Алан сарæзтой, археологтæ кæй ссардтой, ахæм рагон æфсæддоны фæлгонц. Сæрмагонд кусæнгрæзты фæрцы иртæстой хуызистытæ. Йæ уæлæдарæс, хæцæнгарз, сæрыхъуынтæ иууылдæр конд сты къухæй.
Æфсæддонæн йæ бæрзæнд у дыууæ метрмæ хæстæг. Таутиаты Азæйы къухы бафтыди стыр куыст бакæнын. Бирæ æнусты размæ чи царди, уыцы адæймаджы цæсгомы вæрд æмæ йæ къухты тугдадзинтæ адæмы размæ æцæгты хуызæн рахæссын, уый æнцон хъуыддаг нæу. Æцæгдзинад, уый уыди авторы фыццаградон нысан. Сæрмæтаг æфсæддон ныридæгæн бирæ равдыстыты хъахъхъæдта республикæйы кад. Фидæны гæнæн ис, æмæ суыдзæни Лиссабоны музейтæй иуы экспонат.
Таутиаты Азæ нæ республикæйы у зындгонд куклатæ аразæг. Къухдæсны кусы национ стильмæ гæсгæ. Архайы, ирон адæмы рагон царды æууæлтæ равдисыныл. Сæрмæтаг æфсæддон ахæм стыр æмвæзадыл куыст у дыккаг.
Портретон фæлгонц равдисын иу хуызистмæ гæсгæ уый у зындгонд кадæггæнæджы хиуæтты цур тынг бæрнондзинад. Ныртæккæ райдыдта ног проектыл кусын. Ныр та фæнд кæны Скифты æфсæддоны снывæндын. 7 азы размæ Азæйы уырнгæ дæр нæ кодта, куклатæ аразын йæ царды ахсджиаг хъуыддæгтæй иу суыдзæн, уый.
Абон Таутиаты Азæ йæ зонындзинæдтæ рæдауæй лæвар кæны æндæр къухдæснытæн. Кæй фæнды, уыдоны се ппæты дæр ахуыр кæны лæвар. Йæ къухы бынæй рацæуы хуымæтæг куклатæ нæ, фæлæ ивгъуыды сурæттæ æмæ фæлгонцтæ. Уымæй адæмы зонгæ кæны сæ рагфыдæлты историимæ.
