Абон ыл æххæст кæны 60 азы
Ирон æвзаджы хæзнадон фæхъæздыгдæр кæныныл чи кусы, уыдонæй иу у зындгонд ирон ахуыргонд, ирон æвзаджы æнувыд иртасæг, бирæ зонадон куыстыты автор Тахъазты Мæхæмæты фырт Фидар. Абон ыл æххæст кæны 60 азы.
Æфсæрмдзаст абоны ахуыргонд, зноны Лескейнаг лæппу Тахъазты Фидар йæ царды хабæрттæ адæмы цурмæ хæссын нæ уарзы. Куыд зæгъы, афтæмæй уыдон никæй хъæуынц. Цы куыстытыл архайы, уыдон та кæны зæрдиагæй, æмæ йæ фæнды фæлтæртæн хъæугæ æрмæг ныууадзын.
Бирæсывæллонджын бинонты хъомылгæнинаг Тахъазты Мæхæмæты фырт Фидар йæ абоны дæсныйады фæндагмæ æнцонтæй не рцыд. Йæхи фæлваргæйæ, 1981-æм азы бацыдис Цæгат Ирыстоны паддзахадон университеты филологон факультетмæ, райста дзы ирон æмæ уырыссаг æвзаджы ахуыргæнæджы дæсныйад. Æмæ бирæ азты дæргъы ахуыргæнæгæй куыста Мæцутæйы, Толдзгуны, Дзæуджыхъæуы скъолаты. Абон дæр ын йæ хæлар зæрдæйы ахаст нæ рох кæнынц йе *мкурсонтæ.
Фидар Цæгат Ирыстоны гуманитарон иртæстыты институты кусгæйæ архайы йæ алы куыст дæр биноныг æмæ пайдайаг куыд уа æхсæнадæн, афтæ кæныныл. Йæ хæдахуыргæнæн чиныджы фæрцы ирон æвзаг æппындæр чи нæ зоны, уыдоны бон дæр у, æрмæст уый фæрцы зонындзинæдтæ райсын. Ис дзы хицæндзинæдтæ лексикæйæ, фразеологийæ, йæ грамматикон æрмæг у æнцон æмбарæн. Тахъазты Фидар у фыццаг дыгурон дзырдуаты æмæ бирæ наукон куыстытæ автор. Йæ тæлмацы фæрцы та Хъуыран дæр бакæсæн ис дыгуронау. Тахъазты Фидары хуызæн, мадæлон æвзагмæ куыдфæндыйы цæстæй чи нæ кæсы, ахæм адæмы нымæц фылдæр куы кæна, уæд не взаджы фидæн уыдзæн бæллиццагдæр.
