Ацы бæрæгбон баиу кодта, мадæлон æвзагæн аргъ чи кæны, ахæм адæмы
Ирон æвзаг æмæ литературæйы кадæн мадзæлттæ цæуынц къуырийы дæргъы. Ацы бæрæгбон баиу кодта, мадæлон æвзагæн аргъ чи кæны, ахæм адæмы. Иутæн у сæ дæсныйад, иннæтæн та – йæ культурæ æмæ традицитæ хуыздæр базонынмæ фæндаг. Фæлæ се ппæты дæр иу кæны – нæ хъæздыг бынтæ бахъахъхъæныны нысан. Чехойты Фатимæйæн ныхасы бар
Елизавета Козачок сси республикон конкурсы призер. Донецкаг чызг æмдзæвгæ иронау афтæ зæрдæбынæй бакаст æмæ дисы бафтыдта мадзалы архайджыты. 8-æм къласы ахуырдзауы ныхæстæм гæсгæ, æмдзæвгæйы равдыста йæхи *нкъарæнтæ. Цæгат Ирыстоны йæ бинонтимæ 3 азы размæ æрцардис. Уæд райдыдта зонгæ кæнын нæ адæмы культурæимæ. Максим Петросянцæн дæр æхсызгон у ирон æвзаг ахуыр кæнын, цымыдисдзинад æм æвзæрын кæны йæ кæстæр æфсымæрты зæрдæты дæр. Лæппу бирæ хæттыты фæархайы ирон æвзаг æмæ литературæйы конкурсты, свæййы дзы лауреат дæр. Максимы зонындзинæдтæ хорз дæнцæг сты, ирон – мадæлон æвзаг кæмæн у, уыцы скъоладзаутæн. Йæ хъуыдымæ гæсгæ, æвзаг хъахъхъæнын хъæуы, алы адæймаджы уæхсчытыл ис уыцы бæрнондзинад. Æмдзæвгæтæ дæр равзары, патриотон нысаниуæг кæмæн ис, ахæмтæ.
Ирон æвзаг æрмæст скъолаты нæ ахуыр кæнынц. Йæ зонындзинæдтæ фæуæрæхдæр кæнын йæ бон у алы адæймагæн дæр. Æххуыс та сын кæны ахуыргæнæг Бтемыраты Таймураз – ирон æвзаджы рæзты Центры у курсытæ амонæг. Уыдон арæзт сты цалдæр хайæ. Ахуыртæ цæуынц къордгæйттæй. Тагъд рæстæг сæ фæнд кæнынц онлайн хуызы дæр байгом кæнын, фæфылдæр уыдзæн ахуыргæнджыты нымæц дæр. Таймуразы ныхæстæм гæсгæ, йæ зонындзинæдтæ фæуæрæхдæр кæнын кæй фæнды, уыдон уыйбæрц сты, æмæ сын репетитортæ нæ фаг кæны.
Ирон æвзаг у, хъахъхъахъæнын кæй хъæуы, ахæм стыр хæзна. Традицимæ гæсгæ бæрæгбон апарахат вæййы æнæхъæн республикæйыл. Тематикон мадзæлттæ фæцæуынц къуырийы дæргъы. Ацы аз Алайнаг гимназы сарæзтой интеллектуалон хъазт. Сæ зонындзинæдтæ ирон æвзаг æмæ литературæйæ фæлвæрдтой 3 командæйы.
Не *взаг æмæ литературæ лæвæрд цæуынц хистæртæй, иу кæнынц фæлтæртæ. Цалынмæ мадæлон æвзагыл дзурæм, уæдмæ цæрдзæн ирон æвзаг æмæ ирон литературæ дæр.
