Тæбæхсæуты Балойы номыл академион театры уыд премьерæ. Аивадуарзджытæ федтой Лопе де Вегайы пьесæмæ гæсгæ æвæрд спектакль «Кæфтыты ахуыргæнæг». У ацы театралон сезоны
Испайнаг адæмы миддуне театрдзаутæ банкъардтой спектаклы фыццаг минутæй. Кæфтыты ахуыргæнæг Альдемаро æмæ хъæздыг лæджы чызг Флореллæ, цæмæй иумæ уой, уый тыххæй бирæ зындзинæдтæ бавзарын бахъуыд. Фæлæ уæддæр уарзондзинад фæуæлахиз. Лопе де Вегайы пьесæйы сæйраг хъайтарты сурæттæ Ирон театры сценæйы сарæзтой Уалыты Гиви æмæ Дзукъаты Виктория.
Спектакль бацæттæ кæнын æнцон нæ уыд, зæгъы режиссер Дзиуаты Анатолий. Цалдæр хатты ивд æрцыд, Флореллæйы ролы чи хъазыд, уыцы актрисæ. Уæдæ зындгонд режиссеры дæр-иу йæхи арæх хъуыдис Мæскуымæ цæуын. Фæлæ уæддæр сфæлдыстадон къорд бацархайдта, цæмæй аивадуарзджытæ ма фæфæсмон кæной, театрмæ кæй æрбацыдысты, ууыл.
Дзиуаты Анатолий, режиссер, УФ-йы аивæдты сгуыхт архайæг: «Мах ирон адæм стæм. Ирон адæймаг куыд спецификон цæстæй кæсы уарзондзинадмæ, уый рох кæнын райдыдтам. Ацы спектакльмæ куы бакæсой, уæд, чи зоны, бирæ цæуылдæрты ныхъхъуыды кæной æрыгæттæ».
«Кæфтыты ахуыргæнæджы» архайынц ирон театры фæлтæрдджын артисттæ æмæ æрыгон актертæ, стæй культурæйы колледжы студенттæ. Сыкъаты Марат сарæзта Рикаредойы сурæт. Куыд зæгъы, афтæмæй йын абоны онг ацы роль йæ карьерæйы у сæйрагдæр. Дзиуаты Анатолиимæ бакусын та у стыр бæрнондзинад.
Испайнаг адæмы миддуне æнæ кæфтытæй æххæстæй равдисын нæ бантыстаид. Спектаклы спайда кодтой ахæм испайнаг кæфтытæй, куыд СигидИлия æмæ Тангос. Сæвæрдтой сæ хореографтæ Кокайты Алан æмæ Суанты Валерий.
Кокайты Алан, хореограф: «Мах спайда кодтам испайнаг кæфтытæй, ирæттæм хæстæг чи сты, уыдонæй. Ахæм кæфтытæ ис Испаны зæххыл. Дызæрдыг-иу кодтон. Сæвæрдтон-иу кæфтытæ, æмæ та-иу ацыдтæн Мæскуымæ. Фæлæ зыдтон Валерæ ам кусы. Валерæ кæд семæ ис, уæд алцыдæр уыдзæнис хорз».
Сфæлдыстадон къорд нæ фæрæдыд. Ирон театры аншлаг. Залы иу уæгъд бынат дæр нæй.
Дзлиаты Ритæ: «Тынг фæцыд мæ зæрдæмæ. Нæ театр ногæй раудыгас ис. Æмæ амæй фæстæмæ афтæ уыдзæнис».
Спектакль фæцис, фæлæ ма театруарзджытæ сæ къухæмдзæгъдæй бирæ рæстæг нæ уадзынц актерты сценæйæ. Премьерæ кæй фæрæстмæ, уый дызæрдыггаг нæу.
Хъайтмазты Дзерассæ
