Ирон аивадуарзджытæн уыдзæн, джазы, классикон æмæ национ уацмыстæм байхъусыны фадат. Ахæм лæвар республикæйы цæрджытæн скæндзысты æрыгон фæндырдзæгъдæг Къæбысты Зæлинæ æмæ Суанты Кимы номыл паддзахадон национ эстрадон оркестр.
Къæбысты Зæлинæ тагъд кæны репитицимæ. Суанты Кимы номыл национ эстрадон оркестримæ кусын у бæрнон хъуыддаг, зæгъы æрыгон фæндырдзæгъдæг. Ныр 3 къуырийы дæргъы æрвылбон цæттæ кæнынц концерт «Ирон джаз фæндыр»-мæ.
Къæбысты Зæлинæ: «Æз фыццаг хатт кусын ацы оркестримæ. Семæ мын æнцон у. фæнды мæ зæгъын бузныг музыканттæн, стæй разамонæгæн Къæбойты Николайæн».
Астор Пьяццоллайы Либертанго, Ришар Гальянойы «Вальс Марго», Чик Кореяйы «Испани». Ацы зындгонд уацмыстæ ирон национ инструментыл ацæгъдын æнцон нæу. Фæлæ фæндырыл алцыдæр сфидаудзæн, зæгъы оркестры аивадон разамонæг Къæбойты Николай.
Эксперименталон стиль Зæлинæ фæлвары Горæтгæрон районы музыкалон скъолайы дæр. Ам кусы 7 азы. Йæ хъомылгæнинæгты `хсæн ис 10-аздзыд Тедеты Азæмæт дæр. Фæндырæй цæгъдын ахуыр кæны 3-аг аз. У алыхуызон республикон конкурсты лауреат. Ныр дæр цæттæ кæны радон конкурсмæ. Æвзонг музыкант куыд зæгъы, афтæмæй нырыккон мелодитæ фæндырæй цæгъдын æнцон нæу.
Тедеты Азæмæт: «Цæттæ кæнын ног республикон конкурсмæ «Наши надежды». Сахуыр кодтон ног уацмыстæ: «Этюд», дагестайнаг æмæ «Хонгæ». Фæндырæй зонын националон æмæ нырыккон мелодитæ цæгъдын. Фæлæ нырыккон мелодитæ цæгъдын иу-гыццыл зындæр сты».
Проект «Ирон джаз фæндыр» адæмы зæрдæмæ æнæмæнг кæй фæцæудзæн, ууыл йæ аразджытæ дызæрдыг нæ кæнынц. Концерт æрæмбырд кæндзæн, джаз, классикон æмæ национ музыкæ чи уарзы, уыдоны.
Концерт «Ирон джаз фæндыр» уыдзæн 18 февралы уырыссаг академион театры. Йæ аразджытæ куыд зæгъынц, афтæмæй суыдзæн ацы музыкалон сезоны ирддæр цаутæй иу. Фыццаг хатт æнæхъæн изæр иу сценæйæ хъуысдзысты эстрадон оркестры æмæ ирон фæндыры зæлтæ».
Хъайтмазты Дзерассæ
