Челæхсаты Мæдинæ 76 килограммы онг уæзы сси уæлахиздзау, ерысы бронзæ призер та сси Козырты Мария
Ирон спортсментæ сæхи хорз равдыстой Уæрæсейы чемпионаты уæззау атлетикæйæ. Уыд Сыктывкары. Челæхсаты Мæдинæ 76 килограммы онг уæзы сси уæлахиздзау. Ерысы бронзæ призер та сси Козырты Мария. Спортсменкæтимæ фембæлд не сфæлдыстадон къорд. Бæлвырддæр радзурдзæн Хъайтмазты Дзерассæ.
Национ ерыстæ Челæхсаты Мæдинæйæн сты, куыд тыхджындæры титул бахъахъхъæныны радон фадат. Уæрæсейы чемпионаты сыгъзæрин майдан спортсменкæйæн фыццаг нæу. Фарон Мæдинæйæн бантыст дунеон ерысты рамбулын – 76 килограммы онг уæзы категорийы сси æххæст чемпионкæ. Уæрæсейаг турниры спортсменкæ йæ бæрæггæнæн фæхуыздæр кодта. Кæд фарон 2 фæлтæрæны хатдзæгтæм гæсгæ систа 205 килограммы, уæд ацы хатт та 219.
Челæхсаты Мæдинæ – Уæрæсейы чемпионаты уæлахиздзау уæззау атлетикæйæ: «Мæ ныхмæлæууæг уыд тынг тыхджын. Бацархайдтон, тренировкæты куыстон. Рамбылдтон, фæлæ мæ хуыздæр хъæудзæн бакусын. Иннæ чемпионат куы уа, уæд уым, æвæццæгæн фылдæр уæз исдзæн, æмæ мæн дæр фылдæр хъæудзæн исын».
Чысыл не сфаг сыгъзæрин майдан рамбулынæн Козырты Марияйæн. 2 фæлтæрæны систа 85 æмæ 96 килограммы æмæ равдыста æртыккаг бæрæггæнæн – 181 килограммы.
Козырты Мария – Уæрæсейы чемпионаты бронзæ призер уæззау атлетикæйæ: «Были попытки на первенствах России до 17 лет. Там я завоевывала золото. В этот раз помешала травма, волновалась что поврежу свое здоровье. Для меня эти соревнования были показательными. С взрослыми намного сложнее и интереснее бороться».
Чызджыты тренер Гаситы Русланы ныхæстæм гæсгæ, Цæгат Ирыстоны иугонд командæ хорз бæрæггæнæнтæ равдыста. Уæрæсейы чемпионат у æвзарæн турнир. Фæлæ иннæ аз санкциты тыххæй командæйæн йæ бон нæ уыдзæн континенталон чемпионатты архайын. Спортсментæн сæ арæхстдзинад равдисыны фадат уыдзæн, санкцитæй уæгъд цы ерыстæ сты, уыдоны.
Гаситы Руслан – Уæззау атлетикæйæ тренер: «Ерысты архайдтой, 23 азы кæуыл нæма сæххæст, ахæм чызджытæ æмæ лæппутæ. Ерыстæ уыдысты Сыктывкары. Хорз равдыстой сæхи. Уыдис дзы бирæ тыхджын спортсментæ. Фæлæ уæдæдр нæ чызджытæ æмæ лæппутæ сыхи уыдонæй гыццыл харуджындæр равдыстой».
Зындзинæдтæ нæ хынцгæйæ, чызджыты иугонд командæ дарддæр цæттæ кæны ерыстæм. Спортсментæ куыд зæгъынц, афтæмæй цыфæнды рæстæг дæр хъæуы цæттæ уæвын хуыздæр бæрæггæнæн равдисынмæ æрмæст Уæрæсейы нæ, фæлæ дунеон фæзты дæр.
