Йæ фæззæджы ног, 89-æм сезоны феныны фадат уыдзæн алы театрдзаунæ дæр
Фидæны фæлтæртæм кæй хæццæ кæндзысты, уыцы æнусон истори. Тæбæхсæуты Балойы номыл Ирон академион театры равдыстой Кокайты Тотразы пьесæмæ гæсгæ æвæрд спекталы премьерæ «Гæздæнтæ». Уæвгæ, Дзурыхъæуккаг Гæздæнты 7 æфсымæры трагикон истори зоны Цæгат Ирыстоны æмæ нæ бæстæйы алы цæрæг дæр. Уымæн æмæ Фыдыбæстæйы Стыр хæст йæ фæд ныууагъта Советон Цæдисы алы горæты, алы бинонтыл дæр. Гæздæнты æфсымæртæ хъомыл кодтой ирон адæмы æгъдæуттæ æмæ традицитæм гæсгæ. Кад кодтой хистæртæн, æмхъæуккæгтæн. Куы бахъуыд, уæд сыстадысты иуы хуызæн æмæ атырныдтой райгуырæн зæхх знагæй бахъахъхъæнынмæ.
Ацы истори канд æрыгон лæппуты хъæбатырдзинады æмæ лæгдзинады тыххæй нæу, фæлæ ма мады зæрдæйы тыххæй. дæр. Уыцы фидар зæрдæ йæхиуыл бавзæрста хæсты æгъатырдзинад. Йæ фырттæм æнхъæлмæ кæсгæйæ, Гæздæнты Уаниты Тассо бахуыдта авд цухъайы, фæлæ сыл сæ скæнын нал бантыст. Авд æфсымæрæй, хъыгагæн, иу дæр йæ фыдыуæзæгыл нал сæмбæлд. Æртыккаг сау гæххæт куы рбацыд Гæздæнты хæдзармæ, уæд мады зæрдæ нал бафæрæзта, æмæ йæ цардæй ахицæн Тассо. Уыцы сурæт спектаклы йæхиуыл сбарста Гæбуты Жаннæ. Актерты хыгъды Ирон театры ирд минæвæрттæ: Къуымæллæгкаты Владимир, Сугаты Хъазыбег, Хынцæгты Маринæ, æмæ афтæ дарддæр.
Спекаткль сæвæрыны хъæппæрис разынд Тæбæхсæуты Балойы номыл Ирон академион театры аивадон разамонæг Уалыты Гивимæ. Постановкæйыл куыстой мæйы бæрц. Премьерæ равдыстой Æппæтуæрæсеон театралон фестиваль “Вахтангов путь домой”-ы фæлгæты. Залы адæмæй къух бакæнæн нæ уыд. Гæздæнты æфсымæрты истори та ногæй адæмы зæрдæтæ сæнкъуысын кодта. Уымæн æвдисæн – тыхджын къухæмдзæгъд цалдæр минуты кæй не рлæууыд, уый дæр. Спектакль “Газдæнтæ” бацæудзæн Ирон театры репертуармæ. Æмæ йæ фæззæджы ног, 89-æм сезоны феныны фадат уыдзæн алы театрдзаунæ дæр.
