Раздæры истори, фæлæ ног цæстæнгасæй
Ирон драматургийæйы уарзондæр классикæ нырыккон хуызы. Ирон театры сценæйы та ногæй «Цолайы чындзæхсæв». Раздæры истори, фæлæ ног цæстæнгасæй. Æрмæст дзы анæивгæ сты сæйраг хъуыддæгтæ, хæларзæрдæ, цардбæллондзинад, уарзондзинад æмæ адæймаджы сыгъдæг уд. Спектакль фыццæгтимæ федта не сфæлдыстадон къорд, æмæ бæлвырддæр радзурдзæн Касаты Наирæ.
Фыццаг хатт комеди «Цола» ирон театры сценæйы æвæрд æрцыди 80-йæм азты. Спектаклæн ис стыр æнтыстдзинад – йæ хъайтартæ ирон адæмæн сты зонгæ æмæ уарзон, йæ зарджытæ та цалдæр фæлтæрæн ахуыр кæнын дæр нæ хъæуы, абоны онг дæр сæ адæм зарынц хъæлдзæг зæрдæйы ахастимæ.
Чеджемты Георгийы пьесæ ирон драматургийæйы у ирддæр комедитæй иу. Фыццаг режиссер æмæ æвæрæг – Цæгат Ирыстоны аивæдты сгуыхт архайæг, Хетæгкаты Къостайы паддзахадон премийы лауреат Бекъойты Розæ. Адæмы уарзон спектакль «Цола» ирон театры сценæйы æвдыст цæуы 30 азæй фылдæр. Уæдæй нырмæ алы спектаклы фæстæ дæр адæмы къухæмдзæгъдæн кæрон нæ вæййы. Аивадуарзджыты зæрдæмæ афтæ арф бахызт, æмæ алы фæлтæртæн дæр у иу хуызæн æхсызгон.
Спектакльмæ æфтыд æрцыди нырыккон æууæлтæ. Бакуыста йыл театры аивадон разамонæг Уалыты Гиви. У режиссер-æвæрæг дæр. «Цолайы чындзæхсæв» афтæ йæ схуыдтой нырыккон æвзагыл. Уæвгæ, йæ мидис æмæ сюжет сты фыццаджы хуызæн, фæлæ ныр уарзондзинады истори ахæццæ кодтой дарддæр.
Лирикон комеди у Цолайы уарзондзинады истори. Сфæнд кодта йæ цард йæ уарзон чызгимæ баиу кæнын, фæлæ йæ размæ æвзæры цæлхдуртæ. Сæ сæрты хизы æнцонæй. Уымæн та йын æххуыс кæны йæ цардбæллондзинад, сызгъдæг зæрдæ, æмæ рæстуд кæй у, уый. Йæ хъæлдзæг зæрдæйы ахаст, йæ мидбылхудт, цыфæндыйæдæр æм æрхæндæг зæрдæйы ахаст никуы вæййы… Ацы миниуджытæ систы спектаклы бындур.
Зарджытæ, кæфтытæ, юмор ирдæй æвдисынц ирон адæмы национ æууæлтæ, æмæ аивадуарзджыты ахæссынц дард ивгъуыдмæ.
«Цолайы чындзæхсæв» кæд комедион спектакль у, уæддæр, адæймаджы бафтауы арф хъуыдытыл, зынынц дзы царды сæйрагдæр хъуыддæгтæ. Ам баиу сты юмор æмæ сатирæ, афтæмæй æвдисынц социалон фарстатæ. Аивадуарзджытæм æнхъæлмæ кæсы цымыдисаг премьерæ. Актертæ сæ сурæттæ арф кæй банкъардтой, уымæй комеди рауади алы рæстæджыты актуалон уацмыс.
