Ахæм хъæппæрис фехъусын кодта ирыстойнаг культурон-рухстауæн æхсæнад «Алания»
Ирыстойнаг хъазахъхъæгтæн Стъараполы байгом кæндзысты цыртдзæвæн. Уый тыххæй ныффыстой телеграм-канал Кавказ Пост-ы. Ахæм хъæппæрис фехъусын кодта ирыстойнаг культурон-рухстауæн æхсæнад «Алания». Афтæ фæнд кæнынц Ирыстоны бæхджын хъазахъхъæгты дивизионы ном сæнусон кæнын. Стъараполы крайы цæрæнуæтты-коммуналон хæдзарады министрады пресс-службæйæ куыд фехъусын кодтой, афтæмæй монумент сæвæрдзысты Ленины æмæ Пржевальскийы уынгты тигъыл. Уым ивгъуыд æнусы райдиан уыд дивизионы ипподром. Арæзт дзы-иу цыдысты тренировкæтæ æмæ бæхыл бадыны ерыстæ. Ныртæккæ уыцы район хонынц Осетинка. Профилон къамисы уæнгтæ сразы сты уыцы хъуыдыимæ, æмæ мемориалы фæрцы хъахъхъæд кæй цæудзæн истори. Уымæй дарддæр фидардæр кæндзысты граждайнаг иудзинад, рæздзысты Стъараполы æмæ Цæгат Ирыстоны культурон бастдзинæдтæ.
