Йæ равдыст Лотиты Игорь сбаста императоры лейб-гвардийы конвойимæ
Ирыстойнаг хъазахъхъæгты портреттæ фенæн ис Национ музейы. Йæ равдыст Лотиты Игорь сбаста императоры лейб-гвардийы конвойимæ. Сæххæст ыл 210 азы. Нæ республикæйы адæмон нывгæнæг 30 азæй фылдæр иртæста императоры конвойы ирыстойнаг службæгæнджыты истори. Ацы равдыстмæ та бахаста 80 куыстæй фылдæр. Уæвгæ, проектæн бындур æвæрд æрцыд, Лотиты Игорь йæ мыггаджы равзæрды истори базоныныл куы бацархайдта, уæд. Уыцы рæстæг абалц кодта Черноярскæйы æмæ Новоосетиновскæйы станицæтæм. Уæрæсейаг империйы тынг кадджын уыди конвойы службæ кæнын. Бирæтæ бæллыдысты уырдæм бахауынмæ, фæлæ-иу уыцы хъуыддаг бантыст æрмæст æвзæрст адæмæн. Конвойы уæнгтыл уыдис бæрнон хæс æвæрд, хъахъхъæдтой паддзахы бинонты. Лотиты Игоры сæрмагонд равдысты куыстытæ канд нывтæ схонæн нæй, фæлæ суанг документалон архивтæ. Уымæн æмæ бæлвырд æвдисынц императоры конвойы фæлгонцы рацарæзт. Дисы фтауынц уæлæдарæсы æмæ хæцæнгæрзты лыстæг хъуыддæгтæ.
