Куыстуат «Асик»-ы продукцийы документтæ æркæсынмæ æрвыст æрцыдысты УФ-йы Роспатентмæ
Куыстуат «Асик» нæ бæстæйы хъуыстгонд у. Цы этникон куклатæ дзы аразынц, уыдон зонынц æмæ уарзынц бирæ регионты. Нырæй фæстæмæ та сæ продукци парахат кæндзысты Уæрæсейы æрмдæсныйады уникалон бренд «Осетинские костюмные куклы»-йы. Ныртæккæ уал уыцы хъуыддагæн цæттæ кæнынц æмбæлгæ гæххæттытæ. Уæ зæрдыл уын æрлæууын кæндзыстæм, проекты автор фыццаг кукла скодта 32 азы размæ. Ныртæккæ та куыстуат аразы Уæрæсейы алы адæмы хæттыты национ уæлæдарæсы куклатæ. Бæлвырддæр хабæрттæ радзурдзæн Касаты Наирæ.
Фирмæйы стиль, æмбал кæмæн нæй, ахæм æрхъуыдыдзинад æмæ хæрзхъæддзинад, уыимæ рæстæгимæ кæны æмдзу, æмæ кæдфæндыдæр актуалон. Амæй фæстæмæй æрмдæсныйады сфæлдыстадон æппæтуæрæсеон æмæ æппæтадæмон базарады Цæгат Ирыстоны кад хъахъхъæндзæн бренд «Осетинские костюмные куклы». Куыстуат «Асик»-ы продукцийы документтæ æркæсынмæ æрвыст æрцыдысты УФ-йы Роспатентмæ. Сæйраг æргом здæхт цæуы коммерцион æмæ авторон республикон куыстуаты бартæ хъахъхъæнынмæ.
Цымыдисаг уæлæдарæсимæ аивадон куклатæ æмæ къухæй конд ирон кæлмæрзæнтæ. Абон куыстуат «Асик»-мæ ис бирæ патенттæ, фирмæйы стиль, адæмы стыр аргъ, æмæ 32 азы размæ чи райдыдта, уыцы истори. Компанийы бындурæвæрæг Цъæхилты Зæлинæ, уæд уыди историон факультеты æвзонг рауагъдон, уыди йæм бæллиц – ирон национ æууæлтæ æмæ этникон эстетикæйы иу хай дунейæн балæвар кæнын. Уæд райдыдта национ куклатæ аразын, æмæ сног кодта рагон ирон орнаментты хуызтæ. Португали, Египет, Иордани, Сингапур, Саудаг Арви, Великобритани, Франци, Швеци, Итали – æмæ уый æрмæстдæр паддзахадты иу хай, ирон куклатæн стыр аргъ кæм скодтой. Иуæй-иу экспонаттæн ис цымыдисаг биографи.
Фарфорæй конд кукла райдианæй кæронмæ йæ фæндаг ацæуы скульпторимæ, уæлæдарæс ын бацæттæ кæнынц модельертæ, аивгæнæнтæ та зæрингуырдтæ. Къабайы нывæфтыдтæ сты къухæй конд. Куклаты уæлæ национ ирон костюмтæ. Алы фæзилæныл дæр дзы бакусынц историктæ, этнографтæ æмæ нывгæнджытæ. Сæдæгай уникалон орнаменттæ, алкæмæн дæр сæ ис йæхи сакралон мидис. Æвдыст дзы цæуы æнусты куырыхондзинад.
Аивадон хæзнатæ, 100% къухты фæллой æмæ национ стилистикæ. Экспертты хъуыдымæ гæсгæ, иумæйаг бренд саразгæйæ куыстуат «Асик» бахъахъхъæндзæн культурон бынтæ. Абон традицион ирон кукла у зынаргъдæр сувениртæй иу. Алычидæр дзы у 10-гай æрмдæсныты къухвæллойы æвдисæн. Кочиты Светланæ у нывгæнæг-портретист. Ам кусы рагæй. Æрмдæсны куыд зæгъы, афтæмæй алы экспонат дæр зоны цæсгоммæ. Æнæзæрдæмæдзæугæтæ дзы нæй, нæй дзы иухуызæттæ дæр, алкæмæн дæр йæхи уникалон хуыз.
Куыстуат «Асик» сног кодта æмæ ма йæм йæхи ивддзинæдтæ бахаста цъында быйины æмæ нывæфтыдтытæ кæныны процессмæ. Ирон тардицион æрмдæсныйадæн ис стыр ахадындзинад. «Асик»-мæ ис 4 сызгъæрины æмæ дыууæ платинæйæ конд хæрзхъæддзинады нысантæ. Æнусы цыппæрæм хайæ фылдæр куыстуат республикæйы кад хъахъхъæдта æппæтадæмон æмвæзадыл форумты. Актертæ æмæ зарæггæнджытæ, политиктæ æмæ дипломаттæ – дунейы бирæ зындгонд адæмты иу кæны ирон культурæмæ цымыдисдзинад. Бирæтæм дзы сæ коллекциты ис куыстуат «Асик»-ы куклатæ. Абон ирон адæмы стыр зæрдæйы æууæлтæ аивады фæрцы банкъарæн ис зæххы къорийы алы къуымты. Æмæ сæйрагдæр уымæ бæллыди Цъæхилты Зæлинæ йæ фæллойадон фæндаджы райдиан.
