Йæ архайджытæ сты, 11 азæй 19 азы онг кæуыл цæуы, ахæм скъоладзаутæ æмæ студенттæ. Уыдон цалдæр боны экспертты размæ хæсдзысты сæ зонадон-иртасæн, наукон-технологон, сфæлдыстадон æмæ социалон проекттæ. Курдиатджын фæсивæды тыххæй радзурдзæн Чехойты Фатимæ.
Æрыгон иртасджытæн сæ куыстытæ æвдисынц, сæ фидæн куыд уынынц, уый. Хъамболты Арсенмæ робототехникæмæ цымыдисдзинад фæзынд, 5-æм къласы ахуырдзау куы уыд, уæд. Йæхæдæг куыд зæгъы уымæ гæсгæ, ахæм конструкци сæмбырд кæнын ын зын нæу. Робототехникæ афтæ бауарзта æмæ, конструкцитыл кусгæйæ, рæстæг куыд атæхы, уый æмбаргæ дæр нæ бакæны. Лæппу конкурсы фыццаг хатт архайы. Бацæттæ кодта робот рæмудзæн æрмæджытæ æдас кæнынæн.
Конкурсы архайынц профессионалон ахуыргæнæндæтты студенттæ дæр. Габолаты Давид бацæттæ кодта монополийæ хъазынæн терминал. Уый руаджы хъазгæйæ гæххæттын æхцатæ нал хъæудзæн. Баивæн сæ уыдзæн пластикон картæтæй. Лæппуйы проект дзуапп дæтты нырыккон царды домæнтæн.
26-æм конкурс арæзт æрцыд зонадон-технологон равдысты æмæ конференцийы хуызæн. Куыст цæуы 12 секцийы – физикæйæ райдай æмæ архитектурæйæ фæуы. Ацы аз конкурсы ногдзинад у зонадон-технологон скъолайы фæзынд.
220 æрыгон иртасæджы бацæттæ кодтой цымыдисаг куыстытæ. Уыдонæй алчидæр ныридæгæн равзæрста йæхицæн уарзон куыст. Уый у – Ирыстоны фидæны къæхдзæф.
Хъуамæ конкурсы архайджытæй исчи, бæстæйы хуыздæр уæлдæр ахуыргæнæндоны студент уæвгæйæ, йæ цард зонадимæ бабæтта. Ахæм тырнындзинадæй хайджын сты бирæтæ. Æмæ кæд афтæ у, уæд фидæны уæлæхизтæн дæр æнæ уæвгæ нæй.
