филиал вгтрк государственная телерадиовещательная компания “Алания”

Ирыстоны национ инструментты ансамблы æмæ хъæбатыртыл зарæггæнджыты хъæлæстæ азæлыдысты Краснодары крайы. Сфæлдыстадон къордтæ архайдтой Сочийы фæсивæды æмæ студентты хсæн арæзт 14-æм фольклорон фестивалы. Æрæджы сыздæхтысты Ирыстонмæ æмæ не сфæлдыстадон къордæн радзырдтой сæ аивадон æнтыстдзинæдты тыххæй. Ансамбль «Фыдæлты намыс» ацагъта рагон Хонгæ. Ацы мелоди сын уæлдай уарзон у, уымæн æмæ йемæ рамбылдтой стыр сфæлдыстадон конкурсы, зæгъынц музыканттæ. Сфæлдыстадон коллектив æрæджы ссыд Сочийæ. Уым архайдта фæсивæды æмæ студентты хсæн цыппæрдæсæм фольклорон фестивалы. Афтæмæй Краснодары крайы аивадуарзджыты базонгæ кодтой Ирыстоны культурæимæ. Уырыссаг балалайкæты, баянты æмæ аккорденонты хсæн ирон адæмон инструменттæ зынгæ бæрæг дардтой. Сочийы дисы канд адæмон инструментты ансамбль нæ бафтыдта, фæлæ ма героикон зарæггæнджыты къорд дæр. Ирыстоны хуыздæр æмæ тыхджындæр хъæлæстæ азæлыдысты Краснодары крайы сценæйы. Цыппурсы фестивалы фыццаг хатт бацархайынмæ хуынд æрцыд Цæгат Ирыстоны адæмон артист Карсанаты Мæхæмæты коллектив дæр. Йæ разамындæй доулистты къорд «Хæхты зæлтæ» ныр фæндзæм хатт сси гран-прийы аккаг. Фестивалы æртæ номинацийы архайдта æрыгон курдиатджын чызг Хуытъиты Вероникæ. Чысыл зарæггæнæг рамбылдта æртæ призон бынаты: эстрадон, академион æмæ инструменталон жанрты. Ирыстойнаг артистты ирд курдиатæн ма Сочийы аивадуарзджытæн аккаг аргъ скæныны фадат уыдзæн ноджыдæр иу хатт. Рæхджы уым арæзт æрцæудзæн ног фестиваль «Сызгъæрин пальмæ».