Проект канд киноныв нæу, фæлæ ма регионы культурон бынтæ бахъахъхъæныны мадзæлтты цикл дæр
«Искусство сохранять». Цæгат Ирыстоны кусынц ахæм сæргондимæ цымыдисаг проектыл. Йæ режиссер у Золойты Фатимæ. Проект канд киноныв нæу, фæлæ ма регионы культурон бынтæ бахъахъхъæныны мадзæлтты цикл дæр. Царды йæ уадзынц культурон хъæппæристы Президентон фонды руаджы. Фидæны аивадуарзаг адæммæ цы нхъæлмæ кæсы, уый тыххæй радзурдзæн нæ уацхæссæг Тъехты Элинæ.
Золойты Фатимæ 15 азы кæны кинонывтæ исыны куыст. Æцæг цард кадры уылты равдисын алкæйы бон нæу, фæлæ сылгоймагæн уыцы куыст æнтыстджынæй уайы. Йæ куыстыты вдисы, æрвылбоны царды адæймаджы цæст цæуыл нæ хæцы, уый. Ныртæккæ та режиссер архайы ног проектыл.
Историон цыртдзæвæнтæм базилыны хъæппæрис Фатимæмæ фæзынд 5 азы размæ. Куысты рæстæг уыцы хъуыддаг йæ зæрдæмæ афтæ тынг фæцыд, æмæ ног проектыл ныхас куы рацыд, уæд йæ темæ дызæрдыггаг нал уыд. Проект саразыныл чи куыста, уыдоны иу бахъуыд хæхтæм схизын, цæмæй Ирыстоны рæсугъддзинад ирддæрæй раргом кæной, уый тыххæй.
Историон цыртдзæвæнтæн ног цард чи ратты, уыдоны нæмттæ арæхдæр баззайынц адæмæн æнæзонгæйæ. Фæлæ сæ ныр базондзысты проекты руаджы.
Дзæуджыхъæуы архитектурон хуыз революцийы агъоммæ фенæн уыдзæн проекты фæлгæты. Уый фæрцы ма аивадуарзджытæ базондзысты сценæйы фантастикон реализмы бындурæвæрæг – Евгений Вахтанговы тыххæй. Уæвгæ, дугты æмæ адæмты бастдзинады тыххæй бæстон дзурдзæн проект «Искусство сохранять».
