Уый тыххæй аппаратон æмбырды фехъусын кодта ахуырады æмæ наукæйы министр Алыбекты Эллæ
Иу скъола, дыууæ рæвдауæндоны æмæ 11 хицæн къласы сæхгæдтой карантины Цæгат Ирыстоны. Уый тыххæй аппаратон æмбырды фехъусын кодта ахуырады æмæ наукæйы министр Алыбекты Эллæ.
Æнæниздзинадхъахъхъæнынады министрады бæрæггæнæнтæм гæстæ, сырæзти, ОРВИйы миниуджытимæ дохтыртæм æххуысагур чи рбацыд, уыдоны нымæц. Сæ фылдæр сты сывæллæттæ. Профилон ведомствæйы куыд загътой, афтæмæй ивгъуыд къуыри ацы фæззæг фыццаг хатт сырæзт эпидемиологон къæпхæн. Сергей Меняйло бæрнон адæймæгтæн бабар кодта, цæмæй дарддæр цæст дарой уавæрмæ æмæ ма руадзой, цæмæй эпидемиологон къæпхæн сырæза, уый.
Ныхас цыдис хъармгæнæн сезонмæ цæттæдзинадыл дæр. Республикон доныхызты иугонд куыстуат куыд хъусын кæны, афтæмæй хъармы системæ æнæхъæнæй дæр у цæттæ. Ацы къуыри та фæуыдзæнис республикæйы доныхызты баиу кæныны куыст.
Æмбырды ма куыд фехъусын кодтой, афтæмæй Уæллаг Ларсы арæны сæрты ахизыны бармæ æнхъæлмæ кæсынц 765 уæзласæн машинæйы. Вице-премьер Икъаты Русланбег куыд бафиппайдта, афтæмæй ивгъуыд къуыри Арвыкомы фæндагыл ацыдысты 75 мин адæймаджы æмæ 29 мин уæзласæн машинæйы. Электрон рады регистрацигон сты 236 транспортон фæрæзы.
Цæрæнуæтты-коммуналон хæдзарады министр Таматы Майран радзырдта Уæллаг Зджыды нуазыны донимæ цы уавæр сæвзæрд, уый тыххæй. Йæ фиппаинагмæ гæсгæ, бынæттон цæрджытæм дон цæуы куыд æмбæлы, афтæ. Социалон хызты раздæр цы информаци равæрдтой, уый раст нæу — загъта министр.
