40 азы размæ адæм бахастой сæ фæрæзтæ Цоколаты Геннадийы уынджы зæххы бын кооперативы арæзтадмæ
Иу территори æмæ бирæ лыггæнинаг фарстатæ. 40 азы размæ адæм бахастой сæ фæрæзтæ Цоколаты Геннадийы уынджы зæххы бын кооперативы арæзтадмæ. Бæстыхай хъуамæ суæгъд кодтаид кæртытæ машинæтæй, бирæ бинонтæ та фæнд кодтой боксыты алыхуызон дзауматæ дарын. Фæлæ гаражтæй æххæстæй пайда кæнын кооперативы уæнгтæн афтæ дæр нæ бантыст. Уыимæ ма тæссаг уавæрмæ æрцыд, объекты сæрмæ цы спортивон фæз арæзт æрцыд, уый дæр. Бæлвырддæр хабæрттæ радзурдзæн Хъайтмазты Дзерассæ.
Ацы зæххы бын æрдæгарæзт кооперативыл цæуы 40 азы бæрц. Ам ис 400 гаражы æмæ алкæцыдæр кæлæддзаг уавæры. Сæ сæрмæ та – спортивон фæз, фæхъазынц дзы сывæллæттæ, фæлæ уый æдас нæу. Кæд ма 80-йæм азты гаражтæй чидæртæ пайда кодтой, уæд ныр боксыты хицæуттæн кооперативмæ бахауын дæр нæу сæ бон. Сæ рæстæджы адæм бахастой сæ фæрæзтæ, цæмæй пайда кæной гаражтæй. Хъуыддагыл та райстой тæдзгæ цар, раст чи нæ кусы, ахæм коммуникацитæ. Абайты Валерий у боксытæй иуы хицау. Йæ ныхæстæм гæсгæ, адæмæн сæ бон нæу райсын исбонады бары тыххæй гæххæтт дæр. Фыццаджыдæр, объект раст арæзт нæ уыд, раст цæттæгонд нæ уыдысты документтæ дæр.
Проектмæ гæсгæ ам хъуамæ уыдаид 4 бацæуæны. Сæ бынаты та фæзынд дуканитæ. Джиоты Валерий радзырдта, уыдис къуылымпытæ вентиляцийымæ. Тæрккъæвдаты фæстæ-иу гаражтæ донæй байдзаг сты. Машинæтæ згæ кодтой – ардыгæй-иу сæ утилизаци кæнынмæ аластой.
Кæлæддзаг уавæры тыххæй æрбадтысты конструкциты æмбæрзæнтæ. Сæ сæрмæ сæвзæрд дзыхъхъытæ. Дзæуджыхъæуы администраци территоримæ бацæуæн сæхгæдта. Сыхаг хæдзæртты цæрджыты фæнды, цæмæй фæз саив кæной.
Дзæуджыхъæуы администрацийы специалистты ныхæстæм гæсгæ, абон территорийæн хицау нæй. Горæтæн ам нæй рацаразæн куыстытæ æххæст кæныны бар дæр. Уыимæ кодексмæ гæсгæ, бынæттон хиуынаффæйады оргæнтæ бæрнон сты исбонад хыгъды сæвæрыны хъуыддаджы.
Компенсацитæ кæнæ кæронмæ арæзт гаражтæ. Бирæ азты фæстæ ма адæм сæ зæрдæ дарынц, фарста хорзырдæм лыггонд кæй æрцæудзæн, æмæ цы фæрæзтæ бахастой, уыдон кæй нæ фесæфдзысты, ууыл. Иннæты та фæнды, цæмæй сæ алыварс бынат уа аив æмæ æдас.
