Объектты мониторинг цæуы, партийы Адæмон программæ æххæст кæнгæйæ
«Иугонд Уæрæсе»-йы партион десант сбæрæг кодта Хуымæллæджы æмæ Куырттаты посты хайдæты рацарæзты куыст. Уым баивтой инженерон коммуникацитæ, рудзгуытæ, сæвæрдтой дзы зынгсирвæзты ныхмæ æдасдзинады æмæ видеоцæстдарды системæтæ. Объектты мониторинг цæуы, партийы Адæмон программæ æххæст кæнгæйæ. Бындурон цалцæг куыд цæуы, уый тыххæй радзурдзæн Сосранты Жаннæ.
“Иугонд Уæрæсе”-йы партион десант адæмон программæйы фæлгæты федта, Хуымæллæджы посты хайады рацарæзт куыд цæуы, уый. Ивд дзы æрцыд хъармгæнæн системæ, сæвæрдтой дзы ног рудзгуытæ, зынгсирвæзты ныхмæ системæ, стæй камерæтæ. Рæхджы объект хъуамæ лæвæрд æрцæуа. Уый размæ посты хайад уыд районы бынæттон администрацийы бæстыхайы. Рахизфарсы районы почтамты сæргълæууæг Гæбуты Анжелæ куыд загъта, уымæ гæсгæ хайад адæмæн лæггад кæнын райдадзæн ног азы.
Дарддæр инспекцийы уæнгтæ федтой Куырттаты хъæуы посты хайад. Ног уавæрты кусы сентябрæй фæстæмæ. Партион десант ын скодта бæрзонд аргъ. Почтамты кусджыты хъуыдымæ гæсгæ, цалцæггонд бæстыхайы бирæ æнцондæр у кусын. Уæвгæ ахæм фадæттæ фæзынд республикæйы 9 посты хайады. Уый бæрц та ма цæуынц цалцæггонд.
Инспекцийы уæнгтæ мониторинг скодтой адæмон программæ “Модернизация почтовых отделений”-йы фæлгæты. Йæ арæзтмæ йын сæ цæст дарынц парти «Иугонд Уæрæсе»-йы алы æмвæзады депутаттæ.
